ഇരിട്ടി: ഇരിട്ടി മേഖലയില് തീപ്പിടുത്തം തുടര്ക്കഥയാവുന്നു. തുടര്ച്ചായായുള്ള തീപിടിത്തത്തില് ലക്ഷങ്ങളുടെ കാര്ഷിക വിളകളാണ് നശിച്ചത്. കഴിഞ്ഞ ദിവസം കീഴൂര്, കോക്കാട്, പടിക്കച്ചാല് എന്നിവിടങ്ങളിലാണ് അഗ്നിബാധയുണ്ടായത്.
കീഴൂരില് കെ.പി. അസീസിന്റെ 20 സെന്റ് സ്ഥലം കത്തിനശിച്ചു. ഉളിക്കല് കോക്കാട് എം.എന്. ശശി, പൂവേലില് ജോസഫ് എന്നിവരുടെ കശുമാവിന് തോട്ടങ്ങള്ക്കാണ് തീ പിടിച്ചത്. തീപിടിത്തമുണ്ടായ തോട്ടത്തോടു ചേര്ന്നു നിരവധി തോട്ടങ്ങള് ഉള്ള മേഖലയിലാണ് തീപ്പിടുത്തമുണ്ടായത്. നാട്ടുകാരും അഗ്നിരക്ഷാ സേനയും ചേര്ന്ന് ഏറെ പരിശ്രമിച്ച് തീ നിയന്ത്രണ വിധേയമാക്കി.
പടിക്കച്ചാലിലും കശുമാവ് തോട്ടത്തിനാണ് തീപിടിച്ചത്. സ്റ്റേഷന് ഓഫീസര് കെ. രാജീവന്, അസിസ്റ്റന്റ് സ്റ്റേഷന് ഓഫിസര് ടി.ടി. രാജീവന് എന്നിവരുടെ നേതൃത്വത്തിലുള്ള സംഘം എത്തി തീയണച്ചു. വ്യാഴാഴ്ച മുണ്ടയാംപറമ്പ് നാട്ടേല് പ്രദേശത്ത് 8 ഏക്കര് സ്ഥലവും വെള്ളിയാഴ്ച കച്ചേരിക്കടവില് 9 ഏക്കര് സ്ഥലവും കത്തിനശിച്ചിരുന്നു.
