റായ്പൂര്: കോണ്ഗ്രസ് പ്രവര്ത്തക സമിതിയിലേയ്ക്ക് തെരഞ്ഞെടുപ്പില്ല പകരം നാമനിര്ദേശ രീതി തുടരാന് തീരുമാനമായി. പ്ലീനറി സമ്മേളനത്തിന്റെ ഭാഗമായുള്ള സ്റ്റിയറിംഗ് കമ്മിറ്റിയാണ് നിര്ണായക തീരുമാനമെടുത്തത്. യോഗം ആരംഭിച്ചപ്പോള് തന്നെ പാര്ട്ടി അദ്ധ്യക്ഷന് മല്ലികാര്ജുന് ഖാര്ഗെ എല്ലാ അംഗങ്ങളോടും നിലപാട് വ്യക്തമാക്കാന് ആവശ്യപ്പെട്ടു. തിരഞ്ഞെടുപ്പ് വേണ്ടെന്ന നിലപാടാണ് ഭൂരിഭാഗം അംഗങ്ങളും സ്വീകരിച്ചത്.
തെരഞ്ഞെടുപ്പിലൂടെയാണ് അദ്ധ്യക്ഷനെ തീരുമാനിച്ചത്. ഇതിലൂടെ പാര്ട്ടിയില് ജനാധിപത്യ പ്രക്രിയ ഉണ്ടെന്ന സന്ദേശം നല്കാനായി. എന്നാല്, ലോക്സഭ തിരഞ്ഞെടുപ്പും നിയമസഭാ തിരഞ്ഞെടുപ്പും വരുന്ന സാഹചര്യത്തില് വീണ്ടുമൊരു മത്സരം പാര്ട്ടിയില് നടക്കുന്നത് പൊട്ടിത്തെറിയിലേയ്ക്ക് നയിച്ചേക്കുമെന്നാണ് ഭൂരിഭാഗം അംഗങ്ങളും വിലയിരുത്തിയത്. പി ചിദംബരം, അജയ് മാക്കന് തുടങ്ങിയ നേതാക്കള് തിരഞ്ഞെടുപ്പ് നടക്കണമെന്ന നിലപാട് സ്വീകരിച്ചു. എന്നാല്, ഭൂരിപക്ഷ അഭിപ്രായം കണക്കിലെടുത്ത് തിരഞ്ഞെടുപ്പ് വേണ്ടെന്ന തീരുമാനം മല്ലികാര്ജ്ജുന് ഖാര്ഗെ പ്രഖ്യാപിക്കുകയായിരുന്നു.
