കണ്ണൂര്‍ : തളിപ്പറമ്പിലെ ഡംബിങ് യാര്‍ഡില്‍ തീപിടിത്തം. കുറുമാത്തൂര്‍ വെള്ളാരംപാറയിലെ ഡംബിങ് യാര്‍ഡിലാണ് തീപിടിത്തമുണ്ടായത്. അപകടത്തില്‍ ഇരുനൂറോളം വാഹനങ്ങളാണ് കത്തി നശിച്ചത്. വിവിധ കേസുകളില്‍ ഉള്‍പ്പെട്ട് പോലീസ് പിടികൂടിയ വാഹനങ്ങളാണ് ഇവ. 500ല്‍ അധികം വാഹനങ്ങള്‍ ഇവിടെയുണ്ടായിരുന്നതായാണ് കണക്കുകൂട്ടല്‍.
സമീപത്തെ പറമ്പിലേക്കാണ് ആദ്യം തീ പിടിത്തമുണ്ടായത്. അത് ഡംബിങ് യാര്‍ഡിലേക്കും പടരുകയായിരുന്നു. തീ പടര്‍ന്ന് പിടിച്ചതോടെ തളിപ്പറമ്പ് ശ്രീകണ്ഠാപുരം റോഡില്‍ ഗതാഗത നിയന്ത്രണം ഏര്‍പ്പെടുത്തി. നാല് ഫയര്‍ ഫോഴ്‌സ് യൂണിറ്റുകള്‍ സ്ഥലത്തെത്തിയാണ് തീ നിയന്ത്രണ വിധേയമാക്കിയത്. എങ്ങനെയാണ് തീ പടര്‍ന്നതെന്നതില്‍ വ്യക്തതയില്ല.
വാഹനങ്ങള്‍ പ്രദേശത്ത് നിന്ന് മാറ്റണമെന്നും അപകട സാധ്യതയുണ്ടെന്നും പോലീസിന് നേരത്തെ മുന്നറിയിപ്പ് നല്‍കിയിരുന്നതായി ഫയര്‍ ഓഫീസര്‍ പറഞ്ഞു. ഫയര്‍ ഉദ്യോഗസ്ഥരുടെ മുന്നറിയിപ്പ് അവഗണിച്ചതാണ് ഇത്രയും വലിയ അപകടമുണ്ടാകാന്‍ കാരണമായതെന്നും ആരോപണമുണയര്‍ന്നിട്ടുണ്ട്.
