റായ്പൂര്: നക്സല്, മാവോയിസ്റ്റ് ഭീകരത നടമാടിയ കേന്ദ്രങ്ങളില് നിന്ന് സൈന്യത്തിലേക്ക് ഒഴുക്ക്. ഛത്തിസ്ഗഡിലെ മാവോയിസ്റ്റ് താവളങ്ങളെന്ന് അറിയപ്പെട്ടിരുന്ന ജില്ലകളില്നിന്ന് നാനൂറ് ഗോത്രവര്ഗ യുവാക്കളാണ് സിആര്പിഎഫില് ചേര്ന്നത്. കമ്മ്യൂണിസ്റ്റ് ഭീകരത കൊടികുത്തി വാണ സുക്മ, ബീജാപൂര്, ദന്തേവാദ ജില്ലകളില് നിന്നുള്ള റിക്രൂട്ട്മെന്റ് പൂര്ത്തിയായി.
ഇവരുടെ പരിശീലനം മാര്ച്ചില് തുടങ്ങുമെന്ന് സിആര്പിഎഫ് അധികൃതര് അറിയിച്ചു. 2022 ജൂണ് ഒന്നിനാണ് മാവോയിസ്റ്റ് കേന്ദ്രങ്ങളില് റിക്രൂട്ട്മെന്റ് നടത്താന് കേന്ദ്ര ആഭ്യന്തരമന്ത്രാലയം അനുമതി നല്കിയത്. എട്ട് മുതല് പത്ത് ക്ലാസ് വരെയുള്ള വിദ്യാഭ്യാസം മാനദണ്ഡമാക്കിയായിരുന്നു റിക്രൂട്ട്മെന്റ്. തെരഞ്ഞെടുക്കപ്പെട്ടവരില് പത്തില് താഴെ വിദ്യാഭ്യാസം മാത്രമുള്ള യുവാക്കളെ കേന്ദ്ര, സംസ്ഥാന അംഗീകാരമുള്ള നാഷണല് ഇന്സ്റ്റിറ്റിയൂട്ട് ഓഫ് ഓപ്പണ് സ്കൂള് വഴി സിആര്പിഎഫ് നേരിട്ട് പഠിപ്പിക്കുന്നതിനും തീരുമാനമുണ്ട്.
സിആര്പിഎഫ് കോണ്സ്റ്റബിള് തസ്തികയിലേക്ക് ആയിരക്കണക്കിന് അപേക്ഷകളാണ് ഈ മേഖലയില് നിന്നുണ്ടായിരുന്നത്. സുരക്ഷാ കാരണങ്ങളാല് അപേക്ഷകരുടെ വിവരങ്ങള് രഹസ്യമായി സൂക്ഷിക്കുകയായിരുന്നു. സൈന്യത്തില് ചേരാന് ആഗ്രഹം പ്രകടിപ്പിച്ച യുവാക്കളുടെ അച്ഛനമ്മമാര്ക്കു നേരെ ഭീഷണി ഉയര്ന്ന സാഹചര്യത്തിലാണിത്.
കേന്ദ്രത്തില് മോദി സര്ക്കാര് വന്നതിന് ശേഷമാണ് ഗോത്രവര്ഗമേഖലയില് സിആര്പിഎഫ് റിക്രൂട്ട്മെന്റ് ആരംഭിച്ചത്. ആദ്യ റിക്രൂട്ട്മെന്റില് 2016ല് ബീജാപൂര്, ദന്തേവാദ, നാരായണ്പൂര്, സുക്മ ജില്ലകളില്നിന്നായി 744 യുവാക്കളെയാണ് തെരഞ്ഞെടുത്തത്. പ്രദേശത്ത് വലിയ തോതില് പരസ്യം കൊടുത്ത് യുവാക്കളെ സൈന്യത്തിലേക്കും പുതിയ ജീവിതത്തിലേക്കും ക്ഷണിച്ചുകൊണ്ടാണ് സിആര്പിഎഫ് ഇത്തരമൊരു നീക്കം ഫലവത്തായി നടപ്പാക്കുന്നതെന്ന് അധികൃതര് വ്യക്തമാക്കി.
