ന്യൂദല്‍ഹി: നീറ്റ് പരീക്ഷയെഴുതുന്ന 22.79 ലക്ഷം കുട്ടികളെയും ജൂണ്‍ 21 ഞായറാഴ്ച കാത്തിരിക്കുന്നത് കുറ്റമറ്റ മത്സരപ്പരീക്ഷ. ചോദ്യപേപ്പര്‍ എത്തിക്കുന്നത് പ്രത്യേക വിമാനത്തില്‍ സിആര്‍പിഎഫ് പട്ടാളക്കാരുടെ സംഘമാണ്.
പരീക്ഷ നടക്കുന്ന രാജ്യത്തെ 552 കേന്ദ്രങ്ങളിലും 14 അന്താരാഷ്‌ട്ര കേന്ദ്രങ്ങളിലും സുരക്ഷ ഒരുക്കാന്‍ 2.5 ലക്ഷം അര്‍ധസൈനികരെയും പൊലീസിനെയും ഒരുക്കിയിട്ടുണ്ട്. പരീക്ഷാപേപ്പറുകള്‍ തയ്യാറാക്കിയ വിഷയവിദഗ്ധരെ പരീക്ഷാപേപ്പര്‍ തയ്യാറാക്കാന്‍ ആരംഭിച്ചത് മുതല്‍ പുറത്ത് വിട്ടിട്ടില്ല. അതായത് ഒരു വിധത്തിലും പേപ്പര്‍ ചോരാതിരിക്കാനുള്ള ക്രമീകരണങ്ങള്‍ നടത്തിയിട്ടുണ്ടെന്നര്‍ത്ഥം. വിവാദങ്ങളും കള്ളപ്രചാരണങ്ങളും നടക്കാതിരിക്കാന്‍ ടെലഗ്രാം നിരോധിക്കുകയും ചെയ്തു. ഇതില്‍ എഡിറ്റ് പേജ് ഓപ്ഷന്‍ ഉപയോഗിച്ചാണ് കഴിഞ്ഞ തവണ നീറ്റ് ചോദ്യപേപ്പര്‍ പങ്കുവെയ്‌ക്കപ്പെട്ടിരുന്നത്.
എല്ലാ പരീക്ഷാകേന്ദ്രങ്ങളിലും സസിടിവി ക്യാമറകളും സ്ഥാപിച്ചിട്ടുണ്ട്. കുട്ടികള്‍ക്ക് ആവശ്യമായ അധിക മെഡിക്കല്‍ സൗകര്യങ്ങളും ഗതാഗത സൗകര്യങ്ങളും ഒരുക്കിയിട്ടുണ്ട്. പരീക്ഷയ്ക്ക് മുന്നോടിയായി ജൂണ്‍ 20 ശനിയാഴ്ച രാവിലെ മുതല്‍ വൈകീട്ട് ആറ് മണി വരെ സുരക്ഷാക്രമീകരണങ്ങള്‍ ശരിയ്‌ക്കും പ്രവര്‍ത്തിക്കുന്നില്ലേ എന്ന് പരിശോധിക്കാന്‍ വിവിധ പരീക്ഷാകേന്ദ്രങ്ങളില്‍ മോക് ഡ്രില്‍ നടത്തിയിരുന്നു. ഇത് വിജയമായി.
പരീക്ഷാര്‍ത്ഥികള്‍ 11 മണിക്കും ഒന്നരയ്‌ക്കും ഇടയില്‍ പരീക്ഷാകേന്ദ്രങ്ങളില്‍ എത്തണം. രണ്ട് മണി മുതല്‍ 5.15വരെയാണ് പരീക്ഷ. ഒന്നരയ്‌ക്ക് എല്ലാ പരിശോധനകളും കഴിഞ്ഞ് ഗേറ്റ് അടയ്‌ക്കും.
