ന്യൂദല്‍ഹി : ഉത്തരാഖണ്ഡ് ജോഷിമഠില്‍ ഭൂമി ഇടിയുന്ന സംഭവത്തില്‍ വാദം കേള്‍ക്കുന്നത് തിങ്കളാഴ്ചത്തേയ്‌ക്ക് മാറ്റിവെച്ചു. സംസ്ഥാനത്തെ നിലവിലെ പ്രശ്‌നങ്ങള്‍ ജനാധിപത്യപരമായി തെരഞ്ഞെടുക്കപ്പെട്ട സ്ഥാപനങ്ങള്‍ നിര്‍വഹിക്കുമെന്നും സുപ്രീംകോടതി ഡിവിഷന്‍ ബെഞ്ച് അറിയിച്ചു.
സ്വാമി അവിമുക്തേശ്വരാനന്ദയാണ് സുപ്രീംകോടതി വിഷയം അടിയന്തിരമായി പരിഗണിക്കണമെന്ന് ആവശ്യപ്പെട്ട് ഹര്‍ജി നല്‍കിയത്. ജസ്റ്റിസ് പി.എസ്. നരസിംഹ, ചീഫ് ജസ്റ്റിസ് ഡി.വൈ. ചന്ദ്രചൂഡ് എന്നിവരങ്ങുന്ന രണ്ടംഗ ഡിവിഷന്‍ ബെഞ്ചാണ് ഹര്‍ജി പരിഗണിച്ചത്.
നഗരത്തിലെ സംഭവങ്ങള്‍ ദേശീയ ദുരന്തമായി പ്രഖ്യാപിക്കണമെന്നും ഇരകള്‍ക്ക് നഷ്ടപരിഹാരം നല്‍കാന്‍ അധികാരികള്‍ക്ക് നിര്‍ദ്ദേശം നല്‍കണമെന്നുമായിരുന്നു ഹര്‍ജിയില്‍ ആവശ്യപ്പെട്ടിരുന്നത്. എന്നാല്‍ രാജ്യത്തെ എല്ലാ അടിയന്തര പ്രശ്നങ്ങളും സുപ്രീംകോടതി അഭിസംബോധന ചെയ്യേണ്ടതില്ല. ഇതിനായി തെരഞ്ഞെടുക്കപ്പെട്ട സംവിധാനങ്ങള്‍ ഉണ്ടെന്നും സുപ്രീംകോടതി അറിയിച്ചു.
അതേസമയം പ്രദേശത്തെ ഭൂമിയുടെ വിചിത്ര പ്രതിഭാസത്തെ തുടര്‍ന്ന് 81 കുടുംബങ്ങളേയാണ് ജോഷിമഠില്‍ നിന്നും ഇതുവരെ മാറ്റിപ്പാര്‍പ്പിച്ചതായി ജില്ലാ ഭരണകൂടം അറിയിച്ചു. അപകട സാധ്യതയേറിയ രണ്ട് ഹോട്ടലുകള്‍ പൊളിച്ചു മാറ്റാനും തീരുമാനിച്ചിട്ടുണ്ട്. വിദഗ്ധ സമിതിയുടെ നിര്‍ദ്ദേശ പ്രകാരമാണ് ഇവരെ മാറ്റുന്നത്. ജോഷിമഠ് കര്‍ണപ്രയാഗ് എന്നിവിടങ്ങളിലെ ഭൂമിയാണ് ഇടിയുന്നത്. കര്‍ണപ്രയാഗിലെ ബഹുഗുണ നഗറില്‍ അമ്പതോളം വീടുകള്‍ക്കാണ് നാശനഷ്ടം സംഭവിച്ചിരിക്കുന്നത്. ചില വീടുകളുടെ മേല്‍ക്കൂര തകരുകയും ചിലതിന് വിള്ളലും വീണിട്ടുണ്ട്.
