തൃശൂര്: സ്വർണം പണയപ്പെടുത്താൻ നൽകാത്തതിന്റെ വൈരാഗ്യത്തിൽ അന്പത്തിമൂന്നുകാരിയെ സുഹൃത്ത് കഴുത്ത് ഞെരിച്ച് കൊന്നു. തളിക്കുളം സ്വദേശി ഷാജിതയാണ് കൊല്ലപ്പെട്ടത്. വലപ്പാട് സ്വദേശിയായ ഓട്ടോറിക്ഷ ഡ്രൈവർ ഹബീബ് (52) അറസ്റ്റിലായി. ഇന്ന് രാവിലെ ഒമ്പതരയോടെയാണ് സംഭവമുണ്ടായത്.
ഷാജിത ഒറ്റയ്ക്കായിരുന്നു താമസം. ഷാജിത സ്ഥിരമായി ഓട്ടം വിളിക്കാറുള്ളയാളായിരുന്നു ഹബീബ്. രാവിലെ മസാലദോശവാങ്ങി വീട്ടിലെത്തിച്ച ഹബീബ് മൂന്ന് പവന്റെ മാല പണയം വയ്ക്കാൻ ചോദിച്ചു. അത് നിഷേധിച്ചതാണ് കൊലപാതകത്തിന് ഇടയാക്കിയത്. ഈ സ്ത്രീയുടെ വീട്ടില് നിന്ന് നിലവിളി ശബ്ദം കേട്ട് അയല്വാസികള് ഓടിയെത്തുകയായിരുന്നു.
വീടിന്റെ കതക് തള്ളിത്തുറന്ന് അകത്തേക്ക് കടന്നപ്പോള് അവശനിലയിലുള്ള ഷാജിതയെയാണ് കണ്ടത്. പ്രതിയെ മറ്റൊരു മുറിയില് നിന്ന് അയല്വാസികള് പിടികൂടുകയായിരുന്നു. ഇയാളുടെ പോക്കറ്റില് നിന്ന് സ്വര്ണവും കണ്ടെടുത്തു. പ്രതിയെ ചോദ്യം ചെയ്തുവരികയാണെന്ന് പോലീസ് അറിയിച്ചു.
