അഹമ്മദാബാദ് :ബിജെപി ചരിത്രവിജയം നേടിയതോടെ ഇനി ഈ ജന്മം ഗുജറാത്തില് പോകാനാവില്ലെന്ന് മോദി വിരുദ്ധ സ്റ്റാന്റപ് കൊമേഡിയന് കുനാല് കമ്ര.
മോദിയെയും ബിജെപിയെയും വിമര്ശിക്കുന്നതില് മുന്പന്തിയില് നില്ക്കുന്ന കൊമേഡിയനാണ് കുനാല് കമ്ര. ബിജെപിയുടെ റെക്കോഡ് വിജയം കണ്ട് നിരാശനായ കുനാല് കമ്ര ട്വിറ്ററില് പങ്കുവെച്ച സന്ദേശം ഇതായിരുന്നു: “അഹമ്മദാബാദ്, സൂറത്ത്, ബറോഡ, രാജ്കോട്ട്, വാപി(ഗുജറാത്തിലെ നഗരങ്ങള്) എന്നിവിടങ്ങളില് ഇനി അടുത്ത ജന്മം പരിപാടി അവതരിപ്പിക്കാം” .
ഏഴ് തവണ തുടര്ച്ചയായി ജയിച്ച ബിജെപി ഇനി തന്റെ ഈ ആയുസ്സ് കഴിയുന്നതുവരെ ജയിച്ചകൊണ്ടേയിരിക്കും എന്നതായിരുന്നു കുനാല് കമ്രയുടെ സന്ദേശത്തിന്റെ അര്ത്ഥം. അതായത് ഗുജറാത്തുകാര് ഇനിയും തുടര്ച്ചയായി ബിജെപിയെ തന്നെ ജയിപ്പിച്ചുകൊണ്ടിരിക്കും എന്ന നിരാശയാണ് കുനാല് കമ്ര പ്രകടിപ്പിച്ചിരിക്കുന്നത്.
കുനാല് കമ്ര മാത്രമല്ല, നിരവധി മോദി വിരുദ്ധര് ഗുജറാത്തിലെ ബിജെപി ജയം കണ്ട് ഞെട്ടിയിരിക്കുകയാണ്. അവരെല്ലാം തെരഞ്ഞെടുപ്പ് ഫലം പുറത്തുവന്നതോടെ കടുത്ത നിരാശയാണ് പ്രകടിപ്പിച്ചിരിക്കുന്നത്. 182 ല് 156 സീറ്റുകളോടെയാണ് ബിജെപി വിജയിച്ചിരിക്കുന്നത്. ഗുജറാത്തില് ഏതെങ്കിലും ഒരു രാഷ്ട്രീയപാര്ട്ടി ഇത്രയും സീറ്റുകള് നേടി വിജയിക്കുന്നത് ഗുജറാത്തിന്റെ ചരിത്രത്തില് ആദ്യമാണ്.
