തിരുവനന്തപുരം : കേരളത്തിലെ സര്വ്വകലാശാലകളിലെ ചാന്സിലര് പദവിയില് നിന്നും തന്നെ എന്തിന് മാറ്റുന്നുവെന്ന് സംസ്ഥാന സര്ക്കാര് നേരിട്ട് ബോധ്യപ്പെടുത്തണമെന്ന് ഗവര്ണര് ആരിഫ് മുഹമ്മദ് ഖാന്. മുഖ്യമന്ത്രി പിണറായി വജയന് തന്നെ ഭീഷണിപ്പെടുത്തുകയാണ്. ഭീകരവാദികളുടെ ഭാഷയിലാണ് മുഖ്യമന്ത്രി സംസാരിക്കുന്നതെന്നും ഗവര്ണര്. സ്വകാര്യ മാധ്യമത്തിന് നല്കിയ അഭിമുഖത്തിലാണ് ഗവര്ണര് ഇക്കാര്യം വ്യക്തമാക്കിയത്.
ചാന്സലര് പദവിയില് നിന്ന് തന്നെ ഒഴിവാക്കാനുള്ള സംസ്ഥാന സര്ക്കാരിന്റെ ഓര്ഡിനന്സ് രാഷ്ട്രപതിക്ക് അയയ്ക്കും. എന്നാല് എന്തുകൊണ്ടാണ് ചാന്സലറെ മാറ്റുന്നതെന്ന് സര്ക്കാര് നേരിട്ട് ബോധ്യപ്പെടുത്തേണ്ടതുണ്ട്. വിസി നിയമനത്തില് ഇടപെടാന് സര്ക്കാരിന് അധികാരമില്ല. യുജിസിയുടെ മാനദണ്ഡങ്ങള് സംസ്ഥാന നിയമങ്ങള്ക്ക് മുകളിലാണ്. സുപ്രീംകോടതി വിധിയില് ഇക്കാര്യം പരാമര്ശിക്കുന്നുണ്ട്.
മുഖ്യമന്ത്രിയുടെയും സര്ക്കാരിന്റെയും ഭീഷണിക്ക് താന് വഴങ്ങില്ല. വെല്ലുവിളിക്കുന്നവര്ക്ക് മനസ്സിലാകുന്ന ഭാഷയില്ത്തന്നെ തിരിച്ചുപറയും. ഇങ്ങോട്ടു പറയുന്ന അതേ ഭാഷയില് മറുപടി നല്കിയാലേ ഇത്തരക്കാര്ക്ക് മനസ്സിലാകൂ. പ്രത്യാഘാതം ഗുരുതരമായാലും പിന്നോട്ടില്ല. ഒട്ടും ബഹുമാനമില്ലാത്ത സമീപനമാണ് മുഖ്യമന്ത്രി സ്വീകരിക്കുന്നത്.
സംസ്ഥാനത്തിന്റെ മേധാവിയേയാണ് ഗുരുതര പ്രത്യാഘാതം നേരിടേണ്ടി വരുമെന്ന് പറഞ്ഞ് മുഖ്യമന്ത്രി ഭീഷണിപ്പെടുത്തുന്നത്. മുഖ്യമന്ത്രി പിണറായി വിജയനെ യുവ ഐപിഎസ് ഉദ്യോഗസ്ഥന് നേരത്തെ തോക്ക് ചൂണ്ടി ഭയപ്പെടുത്തിയെന്ന വെളിപ്പെടുത്തലിനെക്കുറിച്ച് പോലീസ് സ്റ്റേഷനിലെ ഡയറി പരിശോധിച്ചാല് അറിയാം. വിഷയത്തില് കൂടുതല് പ്രതികരിക്കാനില്ലെന്നും ഗവര്ണര് കൂട്ടിച്ചേര്ത്തു.
