ഇരിട്ടി(കണ്ണൂര്‍): ബിജെപി പേരാവൂര്‍ നിയോജകമണ്ഡലം കമ്മിറ്റിയുടെ നേതൃത്വത്തില്‍ ആറളം ഫാം പുനരധിവാസമേഖലയിലെ ആദിവാസികള്‍ക്ക് ഐക്യദാര്‍ഢ്യം പ്രഖ്യാപിച്ചുകൊണ്ട് ഞങ്ങള്‍ നിങ്ങളോടൊപ്പം ദ്വിദിന സഹവാസ സമരസംഗമം 18,19 തീയതികളില്‍ ആറളം ഫാമില്‍ നടക്കും. വളയംചാലില്‍ നടക്കുന്ന സമരസംഗമം 18 ന് രാവിലെ 10 ന് ബിജെപി സംസ്ഥാന ജനറല്‍ സിക്രട്ടറി എം.ടി. രമേശ് ഉദ്ഘാടനം ചെയ്യും.
സംസ്ഥാന-ജില്ലാ നേതാക്കള്‍ ഒരു രാവും രണ്ടു പകലുമായി നടക്കുന്ന സഹവാസ സമര സംഗമത്തില്‍ പങ്കെടുക്കും. ആറളം പുനരധിവാസ മേഖലയിലെ അടക്കം മൂവായിരത്തോളം വരുന്ന ആദിവാസികള്‍ ഉള്‍പ്പെടെ സമരത്തിന്റെ ഭാഗമാകും. 18ന് രാത്രി മുഴുവന്‍ ആദിവാസികള്‍ക്കൊപ്പം സമരവേദിയില്‍ കഴിയുന്ന ബിജെപി നേതാക്കള്‍ക്കുമുന്നില്‍ ആദിവാസി കലാരൂപങ്ങള്‍ അടക്കമുള്ള വിവിധ പരിപാടികളുടെ അവതരണവും നടക്കും. 19 ന് വൈകുന്നേരം നടക്കുന്ന സമാപന പരിപാടി ബിജെപി ദേശീയ നിര്‍വാഹക സമിതി അംഗം കുമ്മനം രാജശേഖരന്‍ ഉദ്ഘാടനം ചെയ്യും.
കഴിഞ്ഞ 8 വര്‍ഷത്തിനിടെ പതിനൊന്നോളം പേരാണ് ആറളം ഫാമില്‍ കാട്ടാന അക്രമത്തില്‍ മരണമടഞ്ഞത്. എന്നാല്‍ ഇവിടുത്തെ കാട്ടാന അക്രമ ഭീഷണി നേരിടാന്‍ ഇടതു-വലത് മുന്നണികള്‍ അലംഭാവം കാണിക്കുകയാണ്. പാവപ്പെട്ട ആദിവാസികളെ കാട്ടാനകള്‍ക്കു മുന്നിലിട്ടുകൊടുത്തുകൊണ്ട് ഇവര്‍ പ്രഹസന നാടകം കളിക്കുകയാണ്. ഏഷ്യയിലെ തന്നെ ഏറ്റവും വലിയ പുനരധിവാസ മേഖലയായ ആറളം ഫാമിലെ വന്യജീവി പ്രശ്ങ്ങള്‍ അടക്കം ഇവിടുത്തെ ആദിവാസികളുടെ ദുരിതപൂര്‍ണ്ണമായ ജീവിതം ദേശീയതലത്തില്‍ ഉയര്‍ത്തിക്കൊണ്ടുവരുവാനുള്ള ബിജെപി ശ്രമത്തിന്റെ ആദ്യ പടിയാണ് ഈ സഹവാസ സമരം.
