ബര്മിങ്ഹാം: വനിതാ ജൂഡോയില് ഇന്ത്യയുടെ സുശീലാദേവിക്ക് വെള്ളി. വനിതകളുടെ 48 കി.ഗ്രാം ഫൈനലില് സുശീലാദേവി ദക്ഷിണാഫ്രിക്കയുടെ മൈക്കേല വൈറ്റ്ബൂയിയോട് പൊരുതിത്തോറ്റു. ആദ്യ റൗണ്ടില് ബൈ ലഭിച്ച സുശീലാദേവി ക്വാര്ട്ടര് ഫൈനലില് മലാവിയുടെ ഹാരിയറ്റ് ബോണിഫസിനെയും സെമിയില് മൗറീഷ്യസിന്റെ പ്രിസ്കില്ല മൊറാന്ഡിനെയും തകര്ത്താണ് കലാശപ്പോരിന് യോഗ്യത നേടിയത്. 2014 ഗ്ലാസ്കോ ഗെയിംസിലെ വെള്ളി മെഡല് ജേത്രിയാണ് മണിപ്പൂര് സ്വദേശിനിയായ സുശീലദേവി.
പുരുഷന്മാരുടെ 66 കി.ഗ്രാം വിഭാഗത്തില് ജസ്ലീന് സിങ് സെയ്നി വെങ്കലത്തിനായി പോരാടും. ആദ്യ രണ്ട മത്സരങ്ങളും ജയിച്ച് സെമിയിലെത്തിയെങ്കിലും ഫൈനലിലേക്കുള്ള പോരാട്ടത്തില് സ്കോട്ട്ലന്ഡിന്റെ ഫിന്ലെ അലനോട് പരാജയപ്പെട്ടു. ഇതോടെ റപ്പാഷെ റൗണ്ടില് മത്സരിക്കാന് അര്ഹത നേടിയ സെയ്നിക്ക് അവിടെ ബൈ ലഭിച്ചു. വെങ്കലത്തിനായുള്ള പോരാട്ടത്തില് ഓസ്ട്രേലിയയുടെ നഥാന് കാറ്റ്സാണ് എതിരാളി.
