ബലൂചിസ്താന്‍: പാകിസ്താനില്‍ ഫുട്ബോള്‍ മത്സരത്തിനിടെ സ്റ്റേഡിയത്തില്‍ ബോംബ് സ്ഫോടനം. പാകിസ്താനിലെ ബലൂചിസ്താനിലുള്ള ടര്‍ബാത്ത് ഫുട്ബോള്‍ സ്റ്റേഡിയത്തിനരികിലാണ് സ്ഫോടനമുണ്ടായത്. സ്ഫോടനത്തില്‍ മൂന്ന് പേര്‍ക്ക് പരിക്കേറ്റതായും റിപ്പോര്‍ട്ടുണ്ട്. സ്റ്റേഡിയത്തിനകത്തുള്ളവര്‍ സുരക്ഷിതരാണെന്ന് പാകിസ്താന്‍ പോലീസ് വ്യക്തമാക്കി.
സ്റ്റേഡിയത്തിനടുത്ത് പാര്‍ക്ക് ചെയ്ത ബൈക്കില്‍ ബോംബ് ഘടിപ്പിച്ചാണ് സ്ഫോടനം നടത്തിയത്. നിരവധി വാഹനങ്ങള്‍ സ്ഫോടനത്തില്‍ തകര്‍ന്നു. സംഭവത്തിനുപിന്നാലെ പാകിസ്താന്‍ പോലീസ് അന്വേഷണം ഊര്‍ജ്ജിതമാക്കിയിട്ടുണ്ട്. ബലൂചിസ്താന്‍ ആഭ്യന്തര മന്ത്രി സിയ ഉല്ല ലാംഗൗ ആക്രമണത്തെ അപലപിക്കുകയും അക്രമികളെ ഉടന്‍ അറസ്റ്റ് ചെയ്യാന്‍ നിയമ നിര്‍വ്വഹണ ഏജന്‍സികള്‍ക്ക് നിര്‍ദ്ദേശവും നല്‍കി.
