കൊച്ചി: ബഫര്സോണ് സംബന്ധിച്ച സുപ്രീം കോടതി ഉത്തരവില് സര്ക്കാര് സ്വീകരിക്കുന്ന നിലപാടുകള് വ്യക്തവും കൃത്യവും ആയിരിക്കണമെന്ന് കെസിബിസി. ജാതിമത ഭേദമന്യേ അനേകലക്ഷങ്ങള് ആശങ്കയില് അകപ്പെട്ടിരിക്കുന്ന ഈ ഘട്ടത്തില് സര്ക്കാര് തീരുമാനങ്ങളും നയങ്ങളും അറിയാന് ജനങ്ങള്ക്ക് അവകാശമുണ്ട്.
ഈ വിഷയത്തില് സര്ക്കാര് സമീപനത്തിലെ ആത്മാര്ത്ഥത സംശയത്തിന്റെ നിഴലിലാണ്. സുപ്രീംകോടതി ഉത്തരവിനെതിരെ ജൂലൈ 6ന് നിയമസഭ അംഗീകരിച്ച പ്രമേയവുമായി സര്ക്കാര് മുന്നോട്ടുപോകുന്നു എന്ന് പറയുമ്പോഴും, 2019-ല് എക്കോ സെന്സിറ്റീവ് സോണ് സംബന്ധിച്ച മന്ത്രിസഭാ തീരുമാനം പിന്വലിക്കാത്തതും പ്രായോഗിക നടപടികള് സ്വീകരിച്ച് യുദ്ധകാലാടിസ്ഥാനത്തില് മുന്നോട്ടുപോകാന് സര്ക്കാര് വൈമനസ്യം പുലര്ത്തുന്നതും പ്രതിഷേധാത്മകമാണ്.
സംരക്ഷിത വനമേഖലകള്ക്ക് ചുറ്റും ഒരു കിലോമീറ്റര് വരെ എക്കോ സെന്സിറ്റിവ് സോണ് ആകാം എന്ന് തീരുമാനിച്ച് കേരളസര്ക്കാര് 2019 ഒക്ടോബറില് പുറപ്പെടുവിച്ച ഉത്തരവ് പിന്വലിക്കാത്തപക്ഷം സുപ്രീംകോടതിയില് നല്കാനിരിക്കുന്ന പുനപരിശോധനാ ഹര്ജിയും സിഇസിയില് നല്കുന്ന അപ്പീലുമടക്കം തള്ളപ്പെടാനുള്ള സാധ്യതയുണ്ട്. അതുകൊണ്ട് ആ തീരുമാനം സര്ക്കാര് തിരുത്തണം. ജൂണിലെ സുപ്രീംകോടതി വിധിയില് നിര്ദേശിച്ചിരിക്കുന്നപ്രകാരം നിലവിലെ ബഫര്സോണ് പ്രഖ്യാപനം പൗരന്മാര്ക്ക് എത്രമാത്രം ദോഷമാണ് എന്നതിന്റെ വിശദമായ റിപ്പോര്ട്ട് തയ്യാറാക്കി അപ്പീല് നല്കാന് ആവശ്യമായ നടപടികള് സര്ക്കാര് ഉടന് സ്വീകരിക്കേണ്ടതാണ്.
‘അതോടൊപ്പം തന്നെ, ഇപ്പോഴുള്ള വനാതിര്ത്തികള് ബഫര്സോണിന്റെ അതിര്ത്തിയായി പുനര്നിര്ണയിച്ച്, വന്യജീവി സങ്കേതങ്ങളുടെ അതിര്ത്തി ഒരു കിലോമീറ്റര് ഉള്ളിലേക്ക് മാറ്റി സ്ഥാപിക്കാനുള്ള നടപടികളും സര്ക്കാര് എടുക്കണം. വിഷയത്തില് ക്രിയാത്മകമായ നിലപാടുകളും നടപടിക്രമങ്ങളും അടിയന്തരമായി സ്വീകരിച്ച് പ്രതിസന്ധിക്ക് പരിഹാരം കണ്ടെത്തണമെന്ന് കേരളകത്തോലിക്കാ സഭാനേതൃത്വം കേരളസര്ക്കാരിനോട് ആവശ്യപ്പെട്ടു.
