കേന്ദ്ര പൊതുമേഖലാ സ്ഥാപനമായ ടിഎച്ച്ഡിസി ഇന്ത്യ ലിമിറ്റഡ് 45 എന്‍ജിനീയര്‍ ട്രെയിനികളെ തെരഞ്ഞെടുക്കുന്നു. സിവില്‍, ഇലക്ട്രിക്കല്‍, മെക്കാനിക്കല്‍ ബ്രാഞ്ചുകളില്‍ 65 ശതമാനം മാര്‍ക്കില്‍ കുറയാതെ ബിഇ/ബിടെക് ബിരുദമെടുത്തവര്‍ക്കാണ് അവസരം. ഗേറ്റ്-2022 സ്‌കോര്‍ അടിസ്ഥാനത്തില്‍ വ്യക്തിഗത അഭിമുഖം നടത്തിയാണ് സെലക്ഷന്‍. വിശദവിവരങ്ങളടങ്ങിയ റിക്രൂട്ട്‌മെന്റ് വിജ്ഞാപനം www.thdc.co.in ല്‍ ലഭ്യമാണ്.
അപേക്ഷകര്‍ ഫുള്‍ടൈം എന്‍ജിനീയറിംഗ് ബിരുദമെടുത്തവരാകണം. എസ്‌സി/എസ്ടി/പിഡബ്ല്യുബിഡി/വിമുക്തഭടന്മാര്‍ വിഭാത്തില്‍പ്പെടുന്നവര്‍ക്ക് യോഗ്യതാപരീക്ഷക്ക് പാസ്മാര്‍ക്ക് മതിയാകും. പത്ത്, പന്ത്രണ്ട് ക്ലാസ് പരീക്ഷകളില്‍ ജനറല്‍ കാറ്റഗറിയില്‍പ്പെടുന്നവര്‍ക്ക് 65% മാര്‍ക്കുണ്ടാകണം. പ്രായപരിധി 2022 ഓഗസ്റ്റ് ഒന്നിന് 30 വയസ്. ഭാരത പൗരന്മാരായിരിക്കണം. അപേക്ഷാ ഫീസ് 600 രൂപ. എസ്‌സി/എസ്ടി/പിബ്ല്യുബിഡി/വിമുക്തഭടന്മാര്‍/ടിഎച്ച്ഡിസിഐഎല്‍ ജീവനക്കാര്‍ക്ക് ഫീസില്ല.
അപേക്ഷ ഓണ്‍ലൈനായി ഇപ്പോള്‍ സമര്‍പ്പിക്കാം. www.thdc.co.in ല്‍ ഓഗസ്റ്റ് ഒന്നുവരെ അപേക്ഷകള്‍ സ്വീകരിക്കും. ഇതിനുള്ള നിര്‍ദ്ദേശങ്ങള്‍ വിജ്ഞാപനത്തിലുണ്ട്. ഗേറ്റ്-2022 രജിസ്‌ട്രേഷന്‍ നമ്പര്‍ സഹിതമാണ് അപേക്ഷിക്കേണ്ടത്. ഗേറ്റ്-2022 അഡ്മിറ്റ് കാര്‍ഡും സ്‌കോര്‍കാര്‍ഡും ഇന്റര്‍വ്യു സമയത്ത് വെരിഫിക്കേഷനായി ഹാജരാക്കണം.
സംവരണ വിഭാഗങ്ങളില്‍പ്പെടുന്നവര്‍ക്ക് ചട്ടപ്രകാരം പ്രായപരിധിയില്‍ ഇളവുണ്ട്. എസ്‌സി/എസ്ടി/ഒബിസി-എന്‍സിഎല്‍/പിഡബ്ല്യുബിഡി/വിമുക്തഭടന്മാര്‍/ഇഡബ്ല്യുഎസ് വിഭാഗങ്ങളില്‍പ്പെടുന്നവര്‍ക്കാണ് സംവരണം. വിവിധ വിഭാഗങ്ങൡപ്പെടുന്നവര്‍ക്കായുള്ള സംവരണ ഒഴിവുകള്‍ വിജ്ഞാപനത്തിലുണ്ട്.
എക്‌സിക്യൂട്ടീവ് എന്‍ജിനീയര്‍ ട്രെയിനികളായി തെരഞ്ഞെടുക്കപ്പെടുന്നവരെ 50,000 രൂപ അടിസ്ഥാന ശമ്പളത്തില്‍ നിയമിക്കും. ഒരുവര്‍ഷത്തെ പരിശീലനം പൂര്‍ത്തിയാവുമ്പോള്‍ സീനിയര്‍ എന്‍ജിനീയറായി ഇ-3 ഗ്രേഡില്‍ 60,000-1,80,000 രൂപ ശമ്പളനിരക്കില്‍ നിയമിക്കുന്നതാണ്. ക്ഷാമബത്ത, ചികിത്‌സാ സഹായം, പ്രോവിഡന്റ് ഫണ്ട്, പെന്‍ഷന്‍, ഗ്രാറ്റുവിറ്റി മുതലായ ആനുകൂല്യങ്ങളുമുണ്ട്. കൂടുതല്‍ വിവരങ്ങള്‍ വിജ്ഞാപനത്തില്‍ ലഭിക്കും.
ജന്മഭൂമി ഓണ്‍ലൈന്‍