തങ്കമണി: കാമാക്ഷി പഞ്ചായത്തില്‍ ഇരുകുട്ടി കരിക്കുംതോളം കൊച്ചുപുരയ്‌ക്കല്‍ സ്‌കറിയയുടെ ഭാര്യ അച്ചാമ്മ(58)യാണ് വീടിന്റെ പിന്നിലെ മണ്‍തിട്ടയിടിഞ്ഞ് വീടിനുള്ളില്‍ പതിച്ച് മണ്ണിനടിയിലകപ്പെട്ടത്.മണ്ണിടിച്ചിലില്‍ വീടിന്റെ ഭിത്തി തകര്‍ന്നു. ഇന്നലെ രാവിലെ ഉണ്ടായ ശക്തമായ മഴയിലാണ് മണ്ണിടിഞ്ഞത്. വീടിന് പിന്‍വശത്തെ മണ്‍തിട്ട ഇടിഞ്ഞ് വീടിനുള്ളിലേക്ക് പതിക്കുകയായിരുന്നു. ഭിത്തിക്ക് സമീപം കട്ടിലില്‍ കിടന്നുറങ്ങിയിരുന്ന അച്ചാമ്മയുടെ ദേഹത്തേക്കാണ് ഇഷ്ടികക്കഷണങ്ങളും മണ്ണും പതിച്ചത്.
സംഭവ സമയം വീട്ടിലുണ്ടായിരുന്നവര്‍ മണ്ണ് മാറ്റി അച്ചാമ്മയെ രക്ഷപെടുത്തി ആശുപത്രിയില്‍ പ്രവേശിപ്പിച്ചു.അച്ചാമ്മയുടെ കൈക്ക് സാരമായി പരിക്കേറ്റു. വീട്ടുപകരണങ്ങള്‍ ഉള്‍പെടെ മണ്ണിനടിയിലായി. കാമാക്ഷി പഞ്ചായത്തധികൃതര്‍ സ്ഥലം സന്ദര്‍ശിച്ചു. വീട് വാസയോഗ്യമല്ലാതായതിനാല്‍ നാട്ടുകാരും പഞ്ചായത്തധികൃതരും ചേര്‍ന്ന് സമീപത്തെ വാടകവീട്ടിലേക്ക് വീട്ടുകാരെ മാറ്റി പാര്‍പ്പിച്ചു.
