ആലപ്പുഴ : പിടക്കോഴി മുട്ട ഇടുന്നത് സ്വാഭാവികം. ചില കോഴികള്‍ രണ്ടെണ്ണമൊക്കെ ഇടുന്നതായി വാര്‍ത്തകള്‍ പുറത്തുവരാറുണ്ട്. എന്നാല്‍ ഒരുദിവസം ഇരുപതിലധികം മുട്ടകള്‍ ഇടുന്ന കോഴിയെപ്പറ്റി കേട്ടിട്ടുണ്ടോ. ആലപ്പുഴ പുന്നപ്ര തെക്ക് ഏഴാം വാര്‍ഡ് ചെറുകാട് വീട്ടില്‍ ബിജുവിന്റെ കോഴി ഇന്ന് രാവിലെ ഇട്ടത് 24 മുട്ടകള്‍.
അല്‍പം വലിപ്പംകുറവാണെന്നത് ഒഴിച്ചാല്‍ സാധാരണ കോഴിമുട്ട തന്നെ. ബിജുവിന്റെ ഈ കോഴി ചില ദിവസങ്ങളില്‍ രണ്ട് മുട്ടവരെ ഇട്ടിരുന്നതാണ്. ഞായറാഴ്ച രാവിലെ കോഴിയുടെ ഒരു കാലിന് അല്‍പം മുടന്ത് പോലെ തോന്നിയപ്പോള്‍ ഉടമയായ ബിജു അതിനെ കുഴമ്പെല്ലാം പുരട്ടി മറ്റ് കോഴികള്‍ക്കൊപ്പം വിടാതെ മാറ്റിയിട്ടു. പിന്നീട് കോഴിയെ ശ്രദ്ധിച്ചപ്പോഴാണ് മുട്ടകള്‍ ഇടുന്നത് ശ്രദ്ധയില്‍ പെടുന്നത്. അത്യപൂര്‍വ്വ കോഴിയെ കാണാന്‍ ബിജുവിന്റെ വീട്ടില്‍ ഇപ്പോള്‍ കാഴ്‌ച്ചക്കാരുടെ ബഹളമാണ്.
