തിരുവനന്തപുരം : വിദ്വേഷ പ്രസംഗ കേസില്‍ ചോദ്യം ചെയ്യലിന് ഹാജരാകാന്‍ പി.സി. ജോര്‍ജിന് വീണ്ടും നോട്ടീസ്. ജൂണ്‍ ആറിന് രാവിലെ 11 മണിക്ക് അന്വേഷണ ഉദ്യോഗസ്ഥര്‍ക്ക് മുമ്പാകെ ഹാജരാകാനാണ് നോട്ടീസ്. വിദ്വേഷ പ്രസംഗക്കേസ് രജിസ്റ്റര്‍ ചെയ്തിട്ടുള്ള ഫോര്‍ട്ട് അസിസ്റ്റന്റ് കമ്മിഷണര്‍ക്ക് മുന്നില്‍ ഹാജരാകാനാണ് നോട്ടീസ് അയച്ചിരിക്കുന്നത്.
വെള്ളിയാഴ്ചയാണ് പിസിക്ക് നോട്ടീസ് അയച്ചത്. കേസില്‍ പിസിക്കെതിരെ പോലീസ് നിയമോപദേശം തേടിയിരുന്നു. അതിന്റെ അടിസ്ഥാനത്തിലാണ് ഇപ്പോള്‍ നോട്ടീസ് നല്‍കിയിരിക്കുന്നത്. മെയ് 29ന് ഹാജരാകണമെന്ന് ആവശ്യപ്പെട്ട് നേരത്തെ അന്വേഷണ സംഘം നോട്ടീസ് നല്‍കിയിരുന്നുവെങ്കിലും പിസി തൃക്കാക്കരയിലക്ക് പോവുകയായിരുന്നു.
തൃക്കാക്കരയില്‍ തെരഞ്ഞെടുപ്പ് പ്രചാരണ പരിപാടിയില്‍ പങ്കെടുക്കേണ്ടതുണ്ടെന്നും ആരോഗ്യപരിശോധനയ്‌ക്ക് ഡോക്ടറെ കാണേണ്ടതുണ്ടെന്നും അതിനാല്‍ ചോദ്യം ചെയ്യല്‍ മറ്റൊരു ദിവസത്തേക്ക് മാറ്റണമെന്നും പി.സി. ജോര്‍ജ് അഭ്യര്‍ത്ഥിക്കുകയായിരുന്നു. തിങ്കളാഴ്ച അദ്ദേഹം ചോദ്യം ചെയ്യലിന് ഹാജരാകുമെന്നാണ് വിവരം.
തുടര്‍ന്ന് പി.സി. ജോര്‍ജിന്റെ നടപടിയില്‍ നിയമോപദേശം തേടിയെങ്കിലും അദ്ദേഹം ജാമ്യ ഉപാധി ലംഘിച്ചിട്ടില്ലെന്ന മറുപടിയാണ് ലഭിച്ചത്. ഇതോടെ ജാമ്യം റദ്ദാക്കാന്‍ വീണ്ടും കോടതിയെ സമീപിക്കില്ലെന്നും പോലീസ് നിലപാട് സ്വീകരിക്കുകയായിരുന്നു.
