ന്യൂദല്ഹി: യാസിന് മാലിക്കിനെ തീവ്രവാദ ഫണ്ടിംഗ് കേസില് ശിക്ഷിച്ചതിനെ വിമര്ശിച്ച ഇസ്ലാമിക രാജ്യങ്ങളുടെ കൂട്ടായ്മയായ ഒഐസിക്ക് മറുപുടിയുമായി ഇന്ത്യ. യാസിന് മാലിക്കിനെ ന്യായീകരിക്കേണ്ട ആവശ്യമില്ലെന്നും. വ്യക്തമായ തെളിവുകളുടെ അടിസ്ഥാനത്തിലാണ് യാസിന് മാലിക്കിനെ കോടതി ശിക്ഷിച്ചിരിക്കുന്നതെന്നും ഇന്ത്യ വ്യക്തമാക്കി.
തീവ്രവാദത്തിനെതിരെ ലോകം സന്ധഝിയല്ലാതെ പാരടുമ്പോള് ഒഐസി ഒരിക്കലും ഈ വിപത്തിനെ ന്യായീകരിക്കാന് ശ്രമിക്കരുത്. സംഘടന തീവ്രവാദ വിരുദ്ധ പ്രവര്ത്തനങ്ങള്ക്ക് പിന്തുണ അറിയിച്ചിട്ടുള്ളതാണ്. മാലിക്കിന്റെ തീവ്രവാദ പ്രവര്ത്തനങ്ങള് തെളിയിക്കുന്ന രേഖകള് കോടതിക്ക് മുന്നില് സമര്പ്പിക്കപ്പെട്ടിട്ടുള്ളതാണെന്നും വിദേശകാര്യ വക്താവ് അരിന്ദാം ബാഗ്ഛി വ്യാക്തമാക്കി.
57 അംഗ ഇസ്ലാമിക രാജ്യങ്ങളുടെ കൂട്ടായ്മയാണ് ഒര്ഗനൈസേഷന് ഓഫ് ഇസ്ലാമിക് കോപ്പറേഷന്. 1969 ല് സ്ഥാപിതമായ സംഘടനയുടെ ആസ്ഥാനം സൗദി തലസ്ഥാനമായ ജിദ്ദയാണ്. കഴിഞ്ഞ ദിവസം കൂടിയ ഒഐസി-ഐപിഎച്ച്ആര്സി യോഗത്തില് ഇന്ത്യ യാസിന് മാലിക്കിന് ശിക്ഷ വിധിച്ചതിനെതിരെ വിമര്ശനം ഉയര്ന്നിരുന്നു. യോഗം സംഭവത്തെ അപലപിക്കുകയും ചെയ്തു. ഇതിന് മരുപടി നല്കിയിരിക്കുകയാണ് ഇന്ത്യ.
ഇന്ത്യയ്ക്കെതിരായുള്ള ഭീകര പ്രവര്ത്തനങ്ങള്ക്ക് സാമ്പത്തിക സഹായം നല്കിയ കേസില് തീവ്രവാദ സംഘടന നേതാവ് യാസിന് മാലിക്കിന് കോടതി ജീവപര്യന്തം തടവുശിക്ഷ വിധിച്ചിരുന്നു. തടവിന് പുറമെ 10,000 രൂപ പിഴയും കോടതി വിധിച്ചു. ഡല്ഹി പട്യാല ഹൗസ് കോടതിയാണ് വിധി പറഞ്ഞത്. താന് ആയുധം വച്ച് കീഴടങ്ങിയിട്ട് ആറു വര്ഷമായെന്നും തികഞ്ഞ ഗാന്ധിയനായാണ് ജീവിക്കുന്നതെന്നും യാസിന് മാലിക് കോടതിയെ അറിയിച്ചു.
എന്നാല്, ഈ വാദം കോടതി അംഗീകരിച്ചില്ല. മാലിക്കിന് വധശിക്ഷ നല്കണമെന്ന് ദേശീയ സുരക്ഷാ ഏജന്സി കോടതിയില് വാദിച്ചു. മാലിക്കിനെതിരെ മോദി സര്ക്കാര് യുഎപിഎ ഉള്പ്പെടെ ചുമത്തിയാണ് നേരത്തെ അറസ്റ്റ് ചെയ്തത്. കേസില് യാസിന് മാലിക്ക് കുറ്റക്കാരനാണെന്നു മേയ് 19ന് എന്ഐഎ കോടതി ജഡ്ജി പ്രവീണ് സിങ് വിധിച്ചിരുന്നു,
കശ്മീരില് നിയമവിരുദ്ധ പ്രവര്ത്തനം നടത്തുന്നതിനു പണം സ്വരൂപിക്കാന് രാജ്യാന്തരതലത്തിലുള്ള സംവിധാനം മാലിക് ഉണ്ടാക്കിയതായി കോടതി കണ്ടെത്തിയിരുന്നു. കശ്മീര് താഴ്വരയില് 2017ല് നടന്ന സംഭവത്തിലാണ് ജമ്മു കശ്മീര് ലിബറേഷന് ഫ്രണ്ട് (ജെകെഎല്എഫ്) നേതാവായ മാലിക് (56) പ്രതിയായത്. 2016 ജൂലൈ എട്ടിന് അനന്ത്നാഗ് ജില്ലയിലെ കൊക്കര്നാഗില് ഹിസ്ബുല് മുജാഹിദീന് കമാന്ഡര് ബുര്ഹാന് വാനി ഏറ്റുമുട്ടലില് കൊല്ലപ്പെട്ടതിനു പിന്നാലെ നാലു മാസം തുടര്ന്ന പ്രക്ഷോഭത്തില് കശ്മീരില് 85 പേര് കൊല്ലപ്പെടുകയും ആയിരത്തിലേറെ പേര്ക്ക് പരുക്കേല്ക്കുകയും ചെയ്തിരുന്നു. ബുര്ഹാന് വാനി ഏറ്റുമുട്ടലില് കൊല്ലപ്പെട്ടതിനു പിന്നാലെ യാസിന് മാലിക്കിനെ കരുതല് തടങ്കലില് പാര്പ്പിച്ചുവെങ്കിലും പിന്നീട് വിട്ടയയച്ചു. 2016ല് സുരക്ഷാസേനയ്ക്ക് നേരെ 89 സ്ഥലങ്ങളില് കല്ലേറുണ്ടായതിനു പിന്നിലും മാലിക്കിന്റെ ആസൂത്രണം ഉണ്ടെന്നാണ് എന്ഐഎ കണ്ടെത്തിയത്. 2019ല് മോദി സര്ക്കാരാണ് മാലിക്കിനെ അറസ്റ്റ് ചെയ്തത്.
