കോഴിക്കോട്:കോഴിക്കോട് ചേവരമ്പലം ബൈപാസിൽ ടൂറിസ്റ്റ് ബസുകൾ കൂട്ടിയിടിച്ച് നാൽപ്പതോളം പേർക്ക് പരിക്ക്. കൊച്ചിയിൽ സോളിഡാരിറ്റി സമ്മേളനം കഴിഞ്ഞു തിരികെ മടങ്ങിയവർ സഞ്ചരിച്ചിരുന്ന ബസും തിരുനെല്ലിയിലേക്ക് തീർഥാടനത്തിന് പോയ മറ്റൊരു ബസുമാണ് കൂട്ടിയിടിച്ചത്.
പരുക്കേറ്റവരെ കോഴിക്കോട് മെഡിക്കൽ കോളജിൽ പ്രവേശിപ്പിച്ചു. ആരുടെയും നില ഗുരുതരമല്ല. ബസുകളുടെ അമിതവേഗമാണ് അപകടത്തിന് കാരണമെന്നാണ് സൂചന. തിങ്കളാഴ്ച പുലർച്ചെ 3.40ഓടെയാണ് അപകടം. ഇടിയുടെ ആഘാതത്തിൽ ഒരു ബസ് തലകീഴായി മറിഞ്ഞു. ഒരു ബസിന്റെ ടയറിന്റെ ഭാഗത്താണ് രണ്ടാമത്തെ ബസ് ഇടിച്ചത്.
ട്രാഫിക് സിഗ്നൽ ഓഫായതും അപകടത്തിന് കാരണമായി. അപകടത്തിന്റെ സിസിടിവി ദൃശ്യങ്ങൾ പുറത്ത് വന്നിട്ടുണ്ട്.
