തിരുവനന്തപുരം: വഖഫ് ബോര്‍ഡ് നിയമനങ്ങള്‍ പി.എസ്.സിക്ക് വിട്ട സര്‍ക്കാര്‍ നടപടിക്കെതിരെ മുസ്ലിം സംഘടനകള്‍ ഉയര്‍ത്തിയ പ്രതിഷേധം തണുപ്പിക്കാന്‍ മുഖ്യമന്ത്രി പിണറായി വിജയന്‍ വിളിച്ച രണ്ടാമത്തെ യോഗം ഇന്ന് നടക്കും. വൈകീട്ട് അഞ്ചിന് തിരുവനന്തപുരം മാസ്‌കറ്റ് ഹോട്ടലില്‍ നടക്കുന്ന യോഗത്തിലേക്ക് പ്രബല മുസ്ലിം സംഘടനകളുടെ പ്രതിനിധികളെയാണ് ക്ഷണിച്ചത്. നേരത്തേ ഓണ്‍ലൈനായി നടത്താന്‍ തീരുമാനിച്ച യോഗം പിന്നീട് നേരിട്ട് നടത്താന്‍ തീരുമാനിക്കുകയായിരുന്നു. സംഘടനകളുമായുള്ള ചര്‍ച്ചക്കുശേഷം മുഖ്യമന്ത്രിയുടെ ഇഫ്താര്‍ വിരുന്നും നടക്കും.
വഖഫ് ബോര്‍ഡിലെ നിയമനങ്ങള്‍ പി.എസ്.സിക്ക് വിടുന്നതിനുള്ള ബില്‍ നേരത്തേ നിയമസഭയില്‍ പാസാക്കുകയും ഗവര്‍ണര്‍ ഒപ്പിട്ട് വിജ്ഞാപനം പുറപ്പെടുവിക്കുകയും ചെയ്തിരുന്നു. നടപടിക്കെതിരെ മുസ്ലിം സംഘടനകള്‍ ഒന്നടങ്കം രംഗത്തുവരികയും മുസ്ലിം ലീഗിന്റെ നേതൃത്വത്തില്‍ പ്രക്ഷോഭം തുടങ്ങുകയും ചെയ്തിരുന്നു. പിന്നാലെ, സമസ്ത കേരള ജംഇയ്യതുല്‍ ഉലമ നേതാക്കളെ മുഖ്യമന്ത്രിയെ നേരില്‍ കണ്ട് തീരുമാനം നടപ്പാക്കരുതെന്ന് ആവശ്യപ്പെടുകയും ചെയ്തിരുന്നു. മുസ്ലിം സംഘടനകളുമായി തുടര്‍ ചര്‍ച്ച നടത്തിയ ശേഷമേ തീരുമാനമെടുക്കൂവെന്ന് മുഖ്യമന്ത്രി ഉറപ്പുനല്‍കിയിരുന്നു.നിയമനങ്ങള്‍ പി.എസ്.സിക്ക് വിടാനുള്ള തീരുമാനവുമായി മുന്നോട്ടുപോകുമെന്ന് കഴിഞ്ഞ നിയമസഭ സമ്മേളനത്തില്‍ വഖഫ് ചുമതലയുള്ള മന്ത്രി വി. അബ്ദുറഹിമാന്‍ വ്യക്തമാക്കിയതോടെ സംഘടനകള്‍ വീണ്ടും പ്രതിഷേധമുയര്‍ത്തിയതോടെയാണ് പിന്നാലെയാണ് ഇന്നു ഇഫ്താര്‍ വിരുന്നും ചര്‍ച്ചയും നടത്താന്‍ പിണറായി തീരുമാനിച്ചത്.
