തൃശ്ശൂര്‍: കെഎസ്ആര്‍ടിസി സ്വിഫ്റ്റ് ബസ് ഇടിച്ച് കുന്നംകുളത്ത് കാല്‍നടയാത്രക്കാരന്‍ മരിച്ചു. തമിഴ്‌നാട് സ്വദേശിയായ പരസ്വാമിയാണ് അന്തരിച്ചത്. ഇന്ന് പുലര്‍ച്ചെ അഞ്ചുമണിയോടെയായിരുന്നു സംഭവം. ബസ് ഇടിച്ചശേഷം നിര്‍ത്താതെ പോയെന്നും ദൃക്‌സാക്ഷികള്‍ പറയുന്നു.
ഇന്ന് പുലര്‍ച്ചെ മറ്റൊരു സ്വിഫ്റ്റ് ബസും അപകടത്തില്‍പ്പെട്ടു. മലപ്പുറം കോട്ടയ്‌ക്കലില്‍വെച്ച് കെഎസ് 042 നമ്പര്‍ ബസ് തടിലോറിയില്‍ തട്ടുകയായിരുന്നു. കയറ്റത്തില്‍വെച്ച് തടിലോറിയെ ഓവര്‍ടേക്ക് ചെയ്യാന്‍ ശ്രമിക്കവെയാണ് അപകടം സംഭവിച്ചത്. ബസിന്റെ ഇടത് റിയര്‍ വ്യൂ മിറര്‍ തകരുകയും മുന്‍വശത്തെ ഗ്ലാസ്സിന്റെ ഒരു ഭാഗം തകരുകയും ചെയ്തു. ആളപയാങ്ങളില്ല.
കഴിഞ്ഞ ദിവസങ്ങളിലായി മൂന്നുവട്ടം കെ സ്വിഫ്റ്റ് ബസ് അപകടത്തില്‍പ്പെട്ടിരുന്നു. ആദ്യ സര്‍വീസ് നടത്തിയ ബസിന്റെ സൈഡ് ഗ്ലാസ് പൊട്ടി 35000 ല്‍ അധികം രൂപയാണ് കെഎസ്ആര്‍ടിസിയ്‌ക്ക് നഷ്ടം സംഭവിച്ചത്.
