ന്യൂദല്ഹി: കോണ്ഗ്രസിന്റെ പരാജയങ്ങള് ഞെട്ടിക്കുന്നതെന്ന് പാര്ട്ടി ദേശീയ അധ്യക്ഷ സോണിയാ ഗാന്ധി. അഞ്ച് സംസ്ഥാനങ്ങളില് നിന്നുള്ള തെരഞ്ഞെടുപ്പ് ഫലങ്ങള് ഞെട്ടിപ്പിക്കുന്നതും വേദനാജനകവുമാണ്. പാര്ട്ടിയെ ശാക്തീകരിക്കാന് നിര്ദേശങ്ങള് ഉയര്ന്നുവന്നിട്ടുണ്ടെന്നും അവ നടപ്പിലാക്കുമെന്നും സോണിയ പറഞ്ഞു.
കോണ്ഗ്രസിന്റെ പുനരുജ്ജീവനം ജനാധിപത്യത്തിന് അത്യന്താപേക്ഷിതമാണെന്ന് സോണിയ പറഞ്ഞു. പാര്ട്ടിയുടെ അര്പ്പണബോധവും നിശ്ചയദാര്ഢ്യവും തുടര്ച്ചയായി പരീക്ഷിക്കപ്പെടുകയാണ്. മുമ്പെങ്ങുമില്ലാത്ത വിധം പരീക്ഷണം സംഘടന നേരിടുകയാണെന്നും അവര് അഭിപ്രായപ്പെട്ടു. പാര്ലമെന്ററി പാര്ട്ടി യോഗത്തിലായിരുന്നു സോണിയയുടെ പ്രതികരണം.
പാര്ട്ടി യോഗത്തില് ഉയര്ന്നുവന്ന നിര്ദേശങ്ങള് പരിഹരിക്കുമെന്ന് വ്യക്തമാക്കിയ കോണ്ഗ്രസ് അധ്യക്ഷ, എല്ലാ പാര്ട്ടി പ്രവര്ത്തകരും ഐക്യത്തോടെ മുന്നോട്ട് പോകണമെന്നും ആവശ്യപ്പെട്ടു. രാഹുല് ഗാന്ധി, മുന് പ്രധാനമന്ത്രി മന്മോഹന് സിങ് തുടങ്ങി ലോക്സഭയിലെയും രാജ്യസഭയിലെയും കോണ്ഗ്രസ് പാര്ലമെന്റംഗങ്ങള് യോഗത്തില് പങ്കെടുത്തു.
