ഡല്ഹി: പൗരത്വ ഭേദഗതി നിയമവുമായി ബന്ധപ്പെട്ട് 2020 ഫെബ്രുവരിയില് ഡല്ഹിയില് നടന്ന കലാപം ആസൂത്രണം ചെയത് കേസില് ജെഎന്യു വിദ്യാര്ത്ഥി മുന് നേതാവ് ഉമര് ഖാലിദിന് ദല്ഹി കോടതി വീണ്ടും ജാമ്യം നിഷേധിച്ചു. കഴിഞ്ഞ ദിവസം ജാമ്യാപേക്ഷ പരിഗണിച്ച കോടതി വിധി പറയുന്നത് ഇന്നത്തേക്ക് മാറ്റിയിരുന്നു. ഇന്ന് കേസ് വീണ്ടും പരിഗണിച്ച കോടതി ജാമ്യാപേക്ഷ നിരസിക്കുകയായിരുന്നു.
പൗരത്വ ഭേദഗതി വിഷയത്തില് ഡല്ഹിയില് നടന്ന കലാപം കൃത്യമായ ആസൂത്രണത്തിന്റെ ഫലമായിരുന്നുവെന്ന് ദല്ഹി പൊലീസ് കോടതിയില് വ്യക്തമാക്കി. ഉന്നത പൊലീസ് ഉദ്യോഗസ്ഥരെയും സര്ക്കാര് അനുകൂലികളെയും തെരഞ്ഞുപിടിച്ച് ആക്രമിക്കാന് കലാപകാരികള് പദ്ധതി തയ്യാറാക്കിയെന്നും ഉമര് ഖാലിദിന്റെ ജാമ്യാപേക്ഷയെ എതിര്ത്ത് പബ്ലിക് പ്രോസിക്യൂട്ടര് കോടതിയില് ആവര്ത്തിച്ചു.
തനിക്കെതിരായ കേസുകള് തെളിയിക്കാന് പ്രോസിക്യൂഷന്റെ പക്കല് തെളിവുകളില്ല എന്നായിരുന്നു ഉമര് ഖാലിദിന്റെ വാദം. 53 പേര് കൊല്ലപ്പെടുകയും എഴുനൂറിലധികം പേര്ക്ക് പരിക്കേല്ക്കുകയും ചെയ്ത കലാപത്തിന്റെ സൂത്രധാരന്മാരില് പ്രധാനിയാണ് ഉമര് ഖാലിദ് എന്ന് പ്രോസിക്യൂഷന് വാദിച്ചു. ഇയാള്ക്കെതിരെ യുഎപിഎ ഉള്പ്പെടെയുള്ള വകുപ്പുകളാണ് ചുമത്തിയിരിക്കുന്നത്.
കലാപം നടക്കുന്ന സമയത്ത് ഉമര് ഖാലിദ്, നദീം, ഖാലിദ് സെയ്ഫി, നടാഷ നര്വാള്, ജാനവി, തബ്രേസ് തുടങ്ങിയവര് പരസ്പരം ഫോണ് കോളുകള് വഴി സജീവമായി ബന്ധപ്പെട്ടു. ഇവര് വ്യത്യസ്ത ഇടങ്ങളില് ഇരുന്നു കൊണ്ട് കലാപം ഏകോപിപ്പിച്ചുവെന്ന് അന്വേഷണത്തില് തെളിഞ്ഞെന്നും പ്രോസിക്യൂഷന്ഡ വ്യക്തമാക്കി.
