തിരുവനന്തപുരം : എല്‍ഡിഎഫ് ഭരിക്കുമ്പോള്‍ കേരളത്തില്‍ ഒന്നും നടത്താന്‍ സമ്മതിക്കില്ലെന്ന നിലപാടിന്റെ സമരമാണ് കെ റെയിലിനെതിരെ സംസ്ഥാന വ്യാപകമായി അരങ്ങേറുന്നതെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍. കെ-റെയില്‍ സര്‍വ്വേ, ഡിപിആര്‍, പാരിസ്ഥിതിക ആഘാത പഠനം എന്നിവയ്‌ക്ക് കേന്ദ്രവും ഹൈക്കോടതിയും അനുമതി നല്‍കിയിട്ടുണ്ട്. ഇപ്പോള്‍ നടക്കുന്ന സമരം ഹൈക്കോടതി വിധിക്കെതിരായുള്ളതാണെന്നും കോടിയേരി പ്രതികരിച്ചു.
കെ റെയില്‍ സര്‍വ്വേ കല്ലിടുന്നതിനെതിരെ സംസ്ഥാന വ്യാപകമായി ജനങ്ങളില്‍ നിന്നും വന്‍ പ്രതിഷേധമാണ് ഉയരുന്നത്. കോട്ടയം കോഴിക്കോട് എന്നിവിടങ്ങളിലെ പല സ്ഥലങ്ങളിലും സംഘര്‍ഷാവസ്ഥ ഉടലെടുക്കുകയും കല്ലിടല്‍ നിര്‍ത്തിവെച്ചിരിക്കുകയുമാണ്. അതിനിടയിലാണ് കോടിയേരിയുടെ പ്രസ്താവന. കെ റെയിലിന്റെ പേരില്‍ നടക്കുന്നത് രാഷ്‌ട്രീയ സമരമാണെന്നും അതിനെ രാഷ്‌ട്രീയമായി തന്നെ നേരിടുമെന്നും കോടിയേരി പ്രതികരിച്ചു.
കഴിഞ്ഞ ദിവസം കെ റെയിലിനെതിരെ അരങ്ങേറിയത് അടി കിട്ടേണ്ട തരത്തിലുള്ള സമരമാണ്. എന്നിരുന്നാലും പോലീസ് സംയമനത്തോടെ സമരക്കാരെ നേരിട്ടു. കെ- റെയിലിനുവേണ്ടി ഭൂമി നഷ്ടമാകുന്ന ജനങ്ങള്‍ പരിഭ്രാന്തരാകേണ്ടതില്ല. ഓരോ വ്യക്തിക്കും അര്‍ഹതപ്പെട്ട നഷ്ടപരിഹാരം നല്‍കിയതിന് ശേഷം മാത്രമേ സര്‍ക്കാര്‍ ഭൂമിയേറ്റെടുക്കൂവെന്നും കോടിയേരി കൂട്ടിച്ചേര്‍ത്തു.
