പൊന്കുന്നം: പനമറ്റത്ത് ഇന്നലെ ഉച്ചകഴിഞ്ഞ് പേപ്പട്ടിയുടെ ആക്രമണം. വിദ്യാര്ഥികള് ഉള്പ്പെടെ 15 പേര്ക്ക് പേപ്പട്ടിയുടെ കടിയേറ്റു. കടിയേറ്റ ഏഴുപേര് മെഡിക്കല് കോളജ് ആശുപത്രിയിലും മറ്റുള്ളവര് കാഞ്ഞിരപ്പള്ളി ജനറല് ആശുപത്രിയിലും ചികിത്സതേടി. പേപ്പട്ടിയെ കണ്ട് ഓടുന്നതിനിടയില് വീണ് പരിക്കേറ്റവരുമുണ്ട്.
പൊന്കുന്നം പോലീസ് സ്ഥലത്തെത്തിയിരുന്നു. നാടാകെ ഭീതിയിലായതോടെ പട്ടിയെ വെടിയവെയ്ക്കാന് ആളെ വിളിച്ചിരുന്നു. എന്നാല് നാട്ടുകാര് ചേര്ന്ന് പട്ടിയെ കുടുക്കിലാക്കാന് ശ്രമിക്കുന്നതിനിടയില് കൊല്ലപ്പെട്ടു.
പനമറ്റം അമ്പലം കവലയിലെ ചായക്കടയ്ക്കുള്ളില് കയറിയ പേപ്പട്ടി കടയുടമ തുടുപ്പയ്ക്കല് ചന്ദ്രശേഖരന് നായരെ (77) കടിച്ചു. കടിയേറ്റുവീണ ചന്ദ്രശേഖരന് നായരെ വീണ്ടും പേപ്പട്ടി കടിച്ചു. പഞ്ചായത്ത് പ്രസിഡന്റ് എസ്.ഷാജിയുടെ നേതൃത്വത്തില് ഇദ്ദേഹത്തെ മെഡിക്കല് കോളജ് ആശുപത്രിയിലെത്തിച്ചു.
പനമറ്റം പൂവേലില് തുളസീധരന്, ഭാര്യ മുന് പഞ്ചായത്തംഗം ബിന്ദു പൂവേലില് എന്നിവരും മെഡിക്കല് കോളജ് ആശുപത്രിയില് ചികിത്സ തേടി. രണ്ടുവിദ്യാര്ഥികളുള്പ്പെടെ മറ്റ് നാലുപേരും മെഡിക്കല് കോളേജില് ചികിത്സയിലുണ്ട്.
പനമറ്റം അമ്പലം കവലയിലും പരിസരത്തും അലഞ്ഞുതിരിയുന്ന നിരവധി നായ്ക്കളെയും പേപ്പട്ടി കടിച്ചു. വളര്ത്തുമൃഗങ്ങളെയും കടിച്ചിട്ടുണ്ട്. വളര്ത്തുനായ്ക്കള്ക്കും മറ്റുമൃഗങ്ങള്ക്കും കടിയേറ്റിട്ടുണ്ടെങ്കില് ഇളങ്ങുളത്തെ മൃഗാശുപത്രയിലെത്തിച്ച് ചികിത്സ നല്കണമെന്ന് സീനിയര് വെറ്ററിനറി സര്ജന് അറിയിച്ചു.
