ഇടുക്കി: കെപിസിസി പ്രസിഡന്റ് കെ.സുധാകരന് ഭീഷണിയുമായി സിപിഎം ഇടുക്കി ജില്ലാ സെക്രട്ടറി സി.വി വര്‍ഗീസ്. സുധാകരന് സിപിഎം കൊടുക്കുന്ന ഭിക്ഷയാണ് ജീവിതമെന്നും, ഒരു നികൃഷ്ട ജീവിയെ കൊല്ലാന്‍ താത്പര്യമില്ലാത്തതുകൊണ്ടു മാത്രമാണ് അദ്ദേഹം ഇപ്പോൾ ജീവിച്ചിരിക്കുന്നതെന്നുമായിരുന്നു വര്‍ഗീസിന്റെ പരാമര്‍ശം.
സിപിഎമ്മിന്റെ കരുത്തിനെ കുറിച്ച്‌ സുധാകരന് ധാരണയുണ്ടാകണമെന്നും വര്‍ഗീസ് മുന്നറിയിപ്പ് നല്‍കി. കോണ്‍ഗ്രസിന്റെ കൊലപാതക രാഷ്‌ട്രീയത്തിനെതിരെ സിപിഎം ചെറുതോണിയില്‍ സംഘടിപ്പിച്ച പ്രതിഷേധ പരിപാടിയിലായിരുന്നു പരാമര്‍ശം.
ഇടുക്കി എഞ്ചിനിയറിംഗ് കോളേജിലെ എസ്എഫ്ഐ വിദ്യാര്‍ത്ഥി ധീരജിനെ കുത്തിക്കൊലപ്പെടുത്തിയ കേസിലെ പ്രതിയായ കോണ്‍ഗ്രസ് പ്രവര്‍ത്തകന്‍ നിഖില്‍ പൈലിയെ ന്യായീകരിച്ച്‌ സുധാകരന് നേരത്തെ രംഗത്തെത്തിയിരുന്നു. നിഖില്‍ പൈലി കുത്തുന്നത് ഒരാളും കണ്ടിട്ടില്ലെന്നും, നിരപരാധികളാണ് ജയിലില്‍ കിടക്കുന്നതെന്നുമൊക്കെയായിരുന്നു സുധാകരന് പറഞ്ഞത്.
