മുബൈ: ശ്രീലങ്കയ്ക്കെതിരായ ടെസ്റ്റ്, ട്വന്റി20 പരമ്പരകള്ക്കുള്ള ഇന്ത്യന് ക്രിക്കറ്റ് ടീമിനെ പ്രഖ്യാപിച്ചു. മലയാളി താരം സഞ്ജു സാംസണ് ട്വന്റി20 ടീമില് തിരിച്ചെത്തി. രോഹിത് ശര്മയുടെ നേതൃത്വത്തിലുള്ള 18 അംഗ ടെസ്റ്റ് ടീമിനെയും 18 അംഗ ഏകദിന ടീമിനെയുമാണ് പ്രഖ്യാപിച്ചത്. മുന് നായകന് വിരാട് കോലി, വിക്കറ്റ് കീപ്പര് ബാറ്റര് ഋഷഭ് പന്ത് എന്നിവര്ക്ക് ട്വന്റി20 പരമ്പരയില്നിന്ന് വിശ്രമം അനുവദിച്ചു. പരുക്കേറ്റ് കുറച്ചുകാലമായി പുറത്തിരിക്കുന്ന ഓള്റൗണ്ടര് രവീന്ദ്ര ജഡേജ ട്വന്റി20 ടീമില് തിരിച്ചെത്തി.
ഫെബ്രുവരി 24നാണ് ശ്രീലങ്കയുടെ ഇന്ത്യന് പര്യടനം ആരംഭിക്കുന്നത്. മൂന്നു മത്സരങ്ങള് ഉള്പ്പെടുന്ന ട്വന്റി20 പരമ്പരയാണ് ആദ്യം നടക്കുക. പിന്നാലെ രണ്ടു മത്സരങ്ങള് ഉള്പ്പെടുന്ന ടെസ്റ്റ് പരമ്പരയും. ലോക ടെസ്റ്റ് ചാംപ്യന്ഷിപ്പിന്റെ ഭാഗമാണ് ടെസ്റ്റ് പരമ്പരയിലെ രണ്ടു മത്സരങ്ങളും. ട്വന്റി20 പരമ്പരയിലെ ആദ്യ മത്സരം ഫെബ്രുവരി 24ന് ലക്നൗവില് നടക്കും. രണ്ടും മൂന്നും മത്സരങ്ങള് ഫെബ്രുവരി 26, 27 തീയതികളിലായി ധരംശാലയിലും അരങ്ങേറും. ടെസ്റ്റ് പരമ്പരയിലെ ആദ്യ മത്സരം മാര്ച്ച് നാലു മുതല് എട്ടു വരെ മൊഹാലിയിലാണ്. രണ്ടാം ടെസ്റ്റ് മാര്ച്ച് 12 മുതല് 16 വരെ ബെംഗളൂരുവിലും നടക്കും. ബെംഗളൂരുവിലെ രണ്ടാം ടെസ്റ്റ് പിങ്ക് ബോള് െടെസ്റ്റാണെന്ന പ്രത്യേകതയുമുണ്ട്.
ഇന്ത്യന് ടെസ്റ്റ് ടീം: രോഹിത് ശര്മ (ക്യാപ്റ്റന്), മയാങ്ക് അഗര്വാള്, വിരാട് കോലി, ശ്രേയസ് അയ്യര്, ശുഭ്മന് ഗില്, ഋഷഭ് പന്ത് (വിക്കറ്റ് കീപ്പര്), കെ.എസ്. ഭരത് (വിക്കറ്റ് കീപ്പര്), രവിചന്ദ്രന് അശ്വിന്, ജയന്ത് യാദവ്, കുല്ദീപ് യാദവ്, ജസ്പ്രീത് ബുമ്ര, മുഹമ്മദ് സിറാജ്, ഉമേഷ് യാദവ്, സൗരഭ് കുമാര്
ഇന്ത്യന് ട്വന്റി20 ടീം: രോഹിത് ശര്മ (ക്യാപ്റ്റന്), ഋതുരാജ് ഗെയ്ക്വാദ്, ഇഷാന് കിഷന് (വിക്കറ്റ് കീപ്പര്), സൂര്യകുമാര് യാദവ്, ശ്രേയസ് അയ്യര്, വെങ്കടേഷ് അയ്യര്, ദീപക് ഹൂഡ, ജസ്പ്രീത് ബുമ്ര (വൈസ് ക്യാപ്റ്റന്), ഭുവനേശ്വര് കുമാര്, ദീപക് ചാഹര്, ഹര്ഷല് പട്ടേല്, മുഹമ്മദ് സിറാജ്, സഞ്ജു സാംസണ് (വിക്കറ്റ് കീപ്പര്), രവീന്ദ്ര ജഡേജ, യുസ്വേന്ദ്ര ചെഹല്, രവി ബിഷ്ണോയ്, കുല്ദീപ് യാദവ്, ആവേശ് ഖാന്
