ചെന്നൈ: നടി നിക്കി ഗല്റാണിയുടെ വീട്ടില് മോഷണം. ചെന്നൈ റോയപേട്ട് ഏരിയയിലെ അപ്പാര്ട്ട്മെന്റിലാണ് മോഷണം നടന്നത്. 1.2 ലക്ഷം വിലപിടിപ്പുള്ള വസ്തുക്കളാണ് മോഷണം പോയത്.
നടിയുടെ വീട്ടില് ജോലി ചെയ്തിരുന്ന ധനുഷാണ് (19) മോഷ്ടാവെന്ന് തിരിച്ചറിഞ്ഞു. പോലീസ് ഇയാളെ അറസ്റ്റ് ചെയ്തു. അഞ്ച് മാസങ്ങള്ക്ക് മുന്പാണ് ഇയാള് നിക്കി ഗല്റാണിയുടെ വീട്ടില് ജോലിക്കെത്തിയത്. തുടര്ന്ന് ജനുവരി 11 ന് ഇയാള് മോഷണ വസ്തുക്കളുമായി കടന്നുകളഞ്ഞെന്ന് നടിയുടെ പരാതിയില് പറയുന്നു. നിക്കിയുടെ 40,000 രൂപ വിലവരുന്ന ക്യാമറയും, അലമാരയില് സൂക്ഷിച്ചിരുന്ന വിലപിടിപ്പുള്ള വസ്ത്രങ്ങളുമാണ് ഇയാള് മോഷ്ടിച്ചത്. സിസിടിവി ദൃശ്യങ്ങളുടെ അടിസ്ഥാനത്തില് നടത്തിയ പരിശോധനയിലാണ് ധനുഷ് മോഷണം നടത്തിയതായി സ്ഥിരീകരിച്ചത്.
പോലീസ് നടത്തിയ അന്വേഷണത്തില് സുഹൃത്തിന്റെ വീട്ടില് നിന്നാണ് ഇയാളെ പിടികൂടിയത്. നടിയുടെ വസ്ത്രങ്ങളും ഇയാളില് നിന്ന് കണ്ടെത്തി. പ്രതിയെ ചോദ്യം ചെയ്യാനായി ചെന്നൈയില് എത്തിച്ചിട്ടുണ്ട്. അതേസമയം മോഷണ വസ്തുക്കള് തിരികെ ലഭിച്ച സാഹചര്യത്തില് നടി ജോലിക്കാരന്റെ പേരിലുള്ള പരാതി പിന്വലിക്കുമെന്നും പോലീസ് അറിയിച്ചു.
