ന്യൂദല്‍ഹി: പുതിയ ഇന്ത്യയുടെ നേര്‍ക്കാഴ്ചയായി കേന്ദ്ര കായികമന്ത്രി അനുരാഗ് താക്കൂര്‍ തിങ്കളാഴ്ച പങ്കുവെച്ചത് 11,000 അടിയോളം ഉയരത്തില്‍ പണി തീര്‍ത്ത കൂറ്റന്‍ ഫുട്ബാള്‍ സ്റ്റേഡിയത്തിന്റെ ആകാശക്കാഴ്ച. ഈ ചിത്രം അദ്ദേഹം തന്റെ ട്വിറ്റര്‍ അക്കൗണ്ടിലാണ് പങ്കുവെച്ചത്. കേന്ദ്രസര്‍ക്കാര്‍ വിഭാവനം ചെയ്ത ഖേലോ ഇന്ത്യ സ്‌പോര്‍ട്‌സ് അടിസ്ഥാനസൗകര്യവികസനത്തിന്റെ ഭാഗമായാണ് ഈ പുതിയ ഫുട്ബാള്‍ സ്റ്റേഡിയം ഒരുക്കിയിരിക്കുന്നത്.
കേന്ദ്രഭരണ പ്രദേശമായ ലഡാക്കിലെ ലേയില്‍ സ്ഥിതിചെയ്യുന്ന സ്പിടുകിലാണ് ഈ ഭീമന്‍ ഫുട്ബാള്‍ സ്റ്റേഡിയം നിര്‍മ്മിച്ചിരിക്കുന്നത്. സമുദ്രനിരപ്പില്‍ നിന്നും 11,000 അടി ഉയരത്തിലാണ് ഈ ഫുട്ബാള്‍ സ്റ്റേഡിയം നിര്‍മ്മിച്ചിരിക്കുന്നത്.
പര്‍വ്വതങ്ങളാലും ശുദ്ധമായ ആകാശത്താലും ചുറ്റപ്പെട്ട ഈ സ്റ്റേഡിയത്തിന്റെ ദൂരക്കാഴ്ച മനോഹരമാണ്. 2021 സെപ്തംബറിലാണ് അന്നത്തെ കേന്ദ്ര കായികമന്ത്രി കിരണ്‍ റിജിജു ഈ ഫുട്ബാള്‍ സ്റ്റേഡിയം പണിയാന്‍ തറക്കല്ലിട്ടത്. ഒരു അസ്‌ട്രേടര്‍ഫ് ഫുട്ബാള്‍ പിച്ചും അതിനെച്ചുറ്റിയുള്ള സിന്തറ്റിക് ട്രാക്കും ഇവിടെയുണ്ട്.
സ്പിട്ടുകിലെ ജനങ്ങളുടെ സ്വപ്‌നമാണ് ഈ സ്റ്റേഡിയം. ഒപ്പം പ്രൊഫഷണല്‍ ഫുട്ബാള്‍ കളിക്കാരാകണമെന്ന് സ്വപ്‌നം കാണുന്ന കുട്ടികള്‍ക്കും ഇത് ഉപകരിക്കും. ഇതോടെ ലഡാക് മറ്റൊരു തൂവല്‍ കൂടി കിരീടത്തില്‍ ചേര്‍ക്കുകയാണ്. പ്രകൃതി സൗന്ദര്യത്തിന്റെ മടിത്തട്ടില്‍ ഫുട്ബാള്‍ മത്സരം ആസ്വദിക്കാന്‍ ഇവിടുത്തെ സാധാരണ ജനങ്ങള്‍ക്ക് കൂടി ഇതോടെ അവസരം ലഭിക്കുകയാണ്.
