ന്യൂദല്ഹി: ഇതിഹാസ കഥക് നര്ത്തകന് പണ്ഡിറ്റ് ബിര്ജു മഹാരാജ് അന്തരിച്ചു. 83 വയസ്സായിരുന്നു. ഹൃദയാഘാതത്തെ തുടര്ന്ന് ഞായറാഴ്ച രാത്രിയായിരുന്നു അന്ത്യം. 1938 ഫെബ്രുവരി 4ന് ഉത്തര് പ്രദേശിലെ ലഖ്നൗവിലായിരുന്നു ബ്രിജ്മോഹന് മഹാരാജ് എന്ന പണ്ഡിറ്റ് ബിര്ജു മഹാരാജിന്റെ ജനനം. കഥക് നര്ത്തകന് എന്നതിന് പുറമെ മറ്റ് ക്ലാസിക്കല് നൃത്ത വിഭാഗങ്ങളിലും പ്രാവീണ്യം തെളിയിച്ച അദ്ദേഹം പദ്മ വിഭൂഷണ് പുരസ്കാര ജേതാവാണ്. പിതാവും ഗുരുവുമായ ജഗന്നാഥ് മഹാരാജിന്റെയും അമ്മാവന്മാരായ ശംഭു മഹാരാജിന്റെയും ലെച്ചു മഹാരാജിന്റെയും പാത പിന്തുടര്ന്നാണ് ബിര്ജു മഹാരാജ് കഥക് രംഗത്തേക്ക് കടന്നു വന്നത്.
ദേവദാസ്, ബാജിറാവു മസ്താനി, വിശ്വരൂപം തുടങ്ങി നിരവധി ഹിറ്റ് സിനിമകള്ക്ക് പണ്ഡിറ്റ് ബിര്ജു മഹാരാജ് നൃത്ത സംവിധാനം നിര്വഹിച്ചിട്ടുണ്ട്. സത്യജിത് റേയുടെ ശത്രരംജ് കേ ഖിലാരി എന്ന ചിത്രത്തിന്റെ ഗാനങ്ങള് ചിട്ടപ്പെടുത്തുകയും നൃത്ത സംവിധാനം നിര്വഹിക്കുകയും ചെയ്തു. പതിമൂന്നാമത്തെ വയസ്സ് മുതല് ഡല്ഹിയിലെ സംഗീത ഭാരതിയില് അദ്ദേഹം നൃത്താധ്യാപകന് ആയിരുന്നു.
2012ല് വിശ്വരൂപം എന്ന ചിത്രത്തിലെ ‘ഉന്നൈ കാണാത്’ എന്ന ഗാനരംഗത്തിന്റെ നൃത്ത സംവിധാനം നിര്വഹിച്ചതിന് അദ്ദേഹത്തിന് ദേശീയ ചലച്ചിത്ര പുരസ്കാരം ലഭിച്ചു. ബാജിറാവു മസ്താനി എന്ന ചിത്രത്തിന് 2016ല് ഫിലിം ഫെയര് പുരസ്കാരം ലഭിച്ചു. പദ്മവിഭൂഷണ് കൂടാതെ പദ്മഭൂഷണ്, കേന്ദ്ര സംഗീത നാടക അക്കാദമി അവാര്ഡ്, കാളിദാസ് സമ്മാന് തുടങ്ങിയ പുരസ്കാരങ്ങളും അദ്ദേഹത്തിന് ലഭിച്ചിട്ടുണ്ട്.
