ചവറ: നവവധു ഭര്‍തൃഗൃഹത്തില്‍ തൂങ്ങിമരിച്ച സംഭവത്തില്‍ ഭര്‍ത്താവ് അറസ്റ്റില്‍. തേവലക്കര പാലയ്‌ക്കല്‍ തോട്ടിന്‍കര വീട്ടില്‍ രാജേഷ്-ബീന ദമ്പതികളുടെ മകള്‍ സ്വാതിശ്രീ (22) ആണ് കഴിഞ്ഞ ബുധനാഴ്ച ഉച്ചയ്‌ക്ക് 11 മണിയോടെ ഭര്‍ത്താവ് ശ്യാംലാലിന്റെ ചവറ തോട്ടിനുവടക്ക് കോട്ടയില്‍ വടക്കതില്‍ വീട്ടില്‍ തൂങ്ങി മരിച്ച നിലയില്‍ കാണപ്പെട്ടത്.
മരണത്തില്‍ ദുരൂഹത ആരോപിച്ച് പെണ്‍കുട്ടിയുടെ ബന്ധുക്കള്‍ തെക്കുംഭാഗം പോലീസില്‍ പരാതി നല്‍കിയിരുന്നു. സ്വാതിശ്രീയുടെയും ശ്യാംലാലിന്റെയും പ്രണയവിവാഹമായിരുന്നു. 2021 ജൂലൈ 22ന് കൊട്ടാരക്കരയിലാണ് വിവാഹം രജിസ്റ്റര്‍ ചെയ്തത്.
പോലീസ് അന്വേഷണത്തില്‍ ശ്യാംലാലിന്റെ ബന്ധുവായ സ്ത്രീ ഇവരുടെ കുടുംബജീവിതത്തില്‍ ഇടപെടുന്നത് പെണ്‍കുട്ടിക്ക് ഇഷ്ടമല്ലായിരുന്നുവെന്നും ഇതിനെ തുടര്‍ന്ന് ഭാര്യയും ഭര്‍ത്താവും തമ്മില്‍ വഴക്കിട്ടിരുന്നതായും കണ്ടെത്തി.
ശ്യാംലാല്‍ നിരന്തരം അസഭ്യം പറയുകയും ഭീഷണിപ്പെടുത്തുകയും ചെയ്തിരുന്നു. ആത്മഹത്യ ചെയ്യുന്നതിന് തൊട്ടുമുമ്പുള്ള ഫോണ്‍ സംഭാഷണത്തിലും ശ്യാംലാല്‍ സ്വാതിശ്രീയോട് കയര്‍ത്തു സംസാരിക്കുന്നതായി തെളിവുകള്‍ ലഭിച്ചു. ഇതിനെ തുടര്‍ന്ന് ആത്മഹത്യ പ്രേരണാകുറ്റത്തിന് ഭര്‍ത്താവിനെ അറസ്റ്റ് ചെയ്യുകയായിരുന്നു. ഇയാളെ കോടതിയില്‍ ഹാജരാക്കി റിമാന്‍ഡ് ചെയ്തു.
