പാലക്കാട് : ഒമിക്രോണ്‍ വ്യാപനത്തെ തുടര്‍ന്ന് തമിഴ്നാട്ടില് ലോക്ഡൗണ്‍ പ്രഖ്യാപിച്ച സാഹചര്യത്തില്‍ വാളയാര്‍ അതിര്‍ത്തികളില്‍ കര്‍ശ്ശന നിയന്ത്രണം. വാളയാര്‍ അതിര്‍ത്തി വഴിയുള്ള വാഹനങ്ങള്‍ കടത്തി വിടുന്നതിനും നിയന്ത്രണമുണ്ട്. അടിയന്തര ആവശ്യങ്ങള്‍ക്ക് പോകുന്ന വാഹനങ്ങള്‍ മാത്രമാണ് കടത്തി വിടുക.
പാലക്കാട് നിന്നും തമിഴ്‌നാട്ടിലേക്ക് ബസുകളും സര്‍വ്വീസ് ഉണ്ടായിരിക്കില്ലെന്ന് കെഎസ്ആര്‍ടിസി അറിയിച്ചിട്ടുണ്ട്. അടിയന്തിര ആവശ്യങ്ങള്‍ക്ക് അല്ലാത്ത വാഹനങ്ങളെല്ലാം തിരച്ചയക്കുമെന്ന് കോയമ്പത്തൂര്‍ ജില്ലാ ഭരണകൂടവും വ്യക്തമാക്കി.
കോവിഡ് കേസുകള്‍ വീണ്ടും വര്‍ധിക്കുന്നതിനെ തുടര്‍ന്ന് തമിഴ്നാട്ടില് ഞായറാഴ്ച സമ്പൂര്‍ണ ലോക്ഡൗണ്‍ ആണ് ഏര്‍പ്പെടുത്തിയത്. അവശ്യ സര്‍വീസുകള്‍ക്ക് മാത്രമാണ് സംസ്ഥാനത്ത് പ്രവര്‍ത്തിക്കാന്‍ അനുമതി.
പൊതു ഗതാഗത സംവിധാനങ്ങളും സര്‍ക്കാര്‍, സ്വകാര്യ സ്ഥാപനങ്ങളുമടക്കം പ്രവര്‍ത്തിക്കില്ല. ലോക്ഡൗണ്‍ ലംഘിച്ച് പുറത്തിറങ്ങുന്നവരുടെ വാഹനങ്ങള്‍ പിടിച്ചെടുക്കുമെന്നും അവര്‍ക്കെതിരെ നിയമ നടപടി സ്വീകരിക്കുമെന്നും തമിഴ്‌നാട് പോലീസ് അറിയിച്ചിട്ടുണ്ട്.
