ന്യൂദല്ഹി: അഞ്ചു സംസ്ഥാനങ്ങളിലെ തെരഞ്ഞെടുപ്പ് തീയതി ഇന്നറിയാം. തെരഞ്ഞെടുപ്പ് കമ്മിഷന്റെ വാര്ത്താസമ്മേളനം മൂന്നരയ്ക്ക് നടക്കും. ഉത്തര്പ്രദേശ്, പഞ്ചാബ്, ഗോവ, ഉത്തരാഖണ്ഡ്, മണിപ്പൂര് എന്നീ സംസ്ഥാനങ്ങളിലെ തെരഞ്ഞെടുപ്പ് പ്രഖ്യാപനമാണ് ഇന്ന് നടക്കുക.
അഞ്ചു സംസ്ഥാനങ്ങളിലെ തെരഞ്ഞെടുപ്പ് മാറ്റിവയ്ക്കേണ്ട സാഹചര്യം ഇപ്പോഴില്ലെന്ന് തെരഞ്ഞെടുപ്പ് കമ്മീഷന് വിലയിരുത്തിയിരുന്നു. തെരഞ്ഞെടുപ്പ് മാറ്റാന് ആരോഗ്യമന്ത്രാലയവും ശുപാര്ശ ചെയ്തിരുന്നില്ല. സംസ്ഥാനങ്ങളിലെ ഒമിക്രോണ് സാഹചര്യത്തെ കുറിച്ചും വാക്സിനേഷന് നിരക്കിനെ കുറിച്ചുമുള്ള റിപ്പോര്ട്ട് തെരഞ്ഞെടുപ്പ് കമ്മീഷനുമായുള്ള കൂടിക്കാഴ്ചയില് ആരോഗ്യ സെക്രട്ടറി കൈമാറിയിരുന്നു.
അഞ്ചു സംസ്ഥാനങ്ങളിലെ കൊവിഡ് വ്യാപനം, വാക്സിനേഷന് നിരക്കുകള് അവലോകനം ചെയ്ത ശേഷണാണ് തീരുമാനം. അഞ്ച് സംസ്ഥാനങ്ങളില് 70 ശതമാനം മുതല് 100 ശതമാനം വരെയാളുകള് ഒരു ഡോസ് വാക്സീന് സ്വീകരിച്ചതായി ആരോഗ്യ സെക്രട്ടറി കമ്മീഷനെ ധരിപ്പിച്ചിരുന്നു. പഞ്ചാബ്, ഗോവ ഉത്തരാഖണ്ഡ്, മണിപ്പൂര് എന്നിവിടങ്ങളില് നിയമസഭയുടെ കാലാവധി മാര്ച്ചിലും ഉത്തര്പ്രദേശില് മെയിലുമാണ് അവസാനിക്കുക.
