കൊച്ചി : നടിയെ ആക്രമിച്ച കേസില് വെളിപ്പെടുത്തലുകള് നടത്തിയ സംവിധായകന് ബാലചന്ദ്ര കുമാറിന്റെ രഹസ്യ മൊഴി എടുക്കാന് അന്വേഷണ സംഘം കോടതിയില് അപേക്ഷ നല്കി. കേസിലെ പ്രതിയായ ദിലീപ് അടക്കമുള്ളവര് നടിയെ ആക്രമിച്ച വിവരങ്ങള് സംസാരിച്ചത് താന് റെക്കോര്ഡ് ചെയ്തെന്നായിരുന്നു സംവിധായകന്റെ വെളിപ്പെടുത്തല്. ഇതിന്റെ രഹസ്യ മൊഴി രേഖപ്പെടുത്തുന്നതിനായി സിജെഎം കോടതിയിലാണ് അന്വേഷണ സംഘം അപേക്ഷ നല്കിയിരിക്കുന്നത്.
കേസില് സംവിധായകന്റെ മൊഴി നിര്ണ്ണായകമായതിനാലാണ് രഹസ്യമായി ഇത് രേഖപ്പെടുത്താന് തീരുമാനിച്ചത്. നടന് ദിലീപിന്റെ ഉള്പ്പടെയുള്ള സംഭാഷണം റെക്കോര്ഡ് ചെയ്ത ഫോണ് കഴിഞ്ഞ ദിവസം കോടതിയില് ഹാജരാക്കിയിട്ടുണ്ട്. ഇത്് ഫോറന്സിക് പരിശോധനയ്ക്ക് അയയ്ക്കും. സംവിധായകന്റെ ഈ വെളിപ്പെടുത്തലില് അന്വേഷണം നടത്തി ജനുവരി 20ന് ഇതുസംബന്ധിച്ച റിപ്പോര്ട്ട് സമര്പ്പിക്കാന് കോടതി നിര്ദ്ദേശിച്ചിട്ടുണ്ട്. എന്നാല് വിചാരണ നിര്ത്തിവെച്ച് തുടരന്വേഷണം നടത്തണമെന്ന പ്രോസിക്യൂഷന്റെ ആവശ്യം പരിഗണിക്കുന്നത് കോടതി ഈ മാസം 20ലേക്ക് മാറ്റി.
അതേസമയം കേസില് തുടര് അന്വേഷണത്തിനായി പ്രത്യേക സംഘത്തെ രൂപീകരിച്ചു. നിലവിലെ അന്വേഷണ സംഘം വിചാരണ നടപടികളെ സഹായിക്കും. ഈ സംഘത്തില് ഉള്ളവരും തുടര് അന്വേഷണത്തിന്റെ ഭാഗമാകുമെന്നും പോലീസ് കോടതിയില് സമര്പ്പിച്ച അപേക്ഷയില് പറയുന്നുണ്ട്.
ബാലചന്ദ്ര കുമാറിനെ വെളിപ്പെടുത്തലിന് അടിസ്ഥാനത്തില് സമഗ്ര തുടരന്വേഷണം ആവശ്യമാണെന്നും അതിനാല് നിലവില് നടക്കുന്ന വിചാരണകള് നിര്ത്തിവെക്കണമെന്നും കോടതിയില് പ്രോസിക്യൂഷന് ആവശ്യപ്പെട്ടിരുന്നു. ഇതിന്റെ അടിസ്ഥാനത്തിലാണ് കോടതി പോലീസിനോട് റിപ്പോര്ട്ട് സമര്പ്പിക്കാന് ആവശ്യപ്പെട്ടത്. എന്നാല് വിചാരണ തുടരണമെന്ന് നടന് ദിലീപിന്റെ അഭിഭാഷകര് കോടതിയോട് അഭ്യര്ത്ഥിച്ചു. ഇതോടെ കേസ് പരിഗണിക്കുന്നത് ജനുവരി 20 ലേക്ക് മാറ്റുകയായിരുന്നു.
