മുംബൈ: തമിഴിലെ സൂപ്പര് നായികയായിരുന്ന നടി അസിന്റെ മകൾ അരിന് ഇപ്പോള് ശ്രദ്ധനേടുകയാണ്. ഓണത്തിന് പൂക്കളമൊരുക്കുന്ന അരിന്റെ ഫോട്ടോ വൈറലായി പ്രചരിക്കുകയാണ്. പ്രത്യേകിച്ചും അസിന് നായികയായി തകര്ത്താടിയ തമിഴ്നാട്ടിലാണ് ഈ ചിത്രം ചൂടപ്പം പോലെ ഷെയര് ചെയ്യപ്പെടുന്നത്.
നടി എന്ന നിലയില് ഉയരങ്ങളില് നില്ക്കെയാണ് നടി അസിന് മുംബൈയിലെ ഒരു വ്യവസായിയെ വിവാഹം കഴിച്ചത്. മുംബൈയില് ബോളിവുഡ് സിനിമയില് അഭിനയിക്കാന് പോയപ്പോള് നടന് അക്ഷയ് കുമാറാണ് അസിന്റെ പ്രണയത്തിന് മധ്യസ്ഥനായത്. അക്ഷയ് കുമാറിന് കൂടി അറിയാവുന്ന രാഹുല് ശര്മ്മയാണ് അസിന്റെ ഭര്ത്താവായി ജീവിതത്തിലേക്ക് കടന്നുവന്നത്. മൈക്രോമാക്സ് മൊബൈല് ഫോണ് കമ്പനിയുടെ ഉടമയായിരുന്നു രാഹുല് ശര്മ്മ. പക്ഷെ ഇവരുടെ വിവാഹത്തിന് ശേഷം ഈ കമ്പനി പൊളിഞ്ഞു. അന്നേരം അസിനും ഭര്ത്താവിന് ഒപ്പം ശക്തമായി നിലകൊണ്ടു. മൈക്രോമാക്സ് മൊബൈല് കമ്പനി പൊളിഞ്ഞെങ്കിലും അതിനെ ഒരു കണ്സ്യൂമര് ഇലക്ട്രോണിക്സ് കമ്പനിയാക്കി മാറ്റി രാഹുല് ശര്മ്മ തിരിച്ചുവരവ് നടത്തുകയായിരുന്നു.
എന്തായാലും അസിന്റെ മകള് അരിന്റയുടെ ഏറ്റവും പുതിയ ഓണാഘോഷ ചിത്രങ്ങൾ സോഷ്യൽ മീഡിയയിൽ വലിയ ശ്രദ്ധ നേടുകയാണ്. മനോഹരമായ ഓറഞ്ച് നിറത്തിലുള്ള പരമ്പരാഗത വസ്ത്രമണിഞ്ഞ്, പൂക്കൾക്ക് നടുവിലിരുന്ന് പൂക്കളമൊരുക്കുന്ന കുഞ്ഞു അരിന്റെ ചിത്രങ്ങൾ അസിൻ തന്നെയാണ് തന്റെ ഇൻസ്റ്റഗ്രാമിലൂടെ ആരാധകരുമായി പങ്കുവെച്ചത്. അമ്മയെപ്പോലെ തന്നെ അതീവ സുന്ദരിയാണ് മകളെന്നും കമന്റുണ്ട്.
വിവാഹശേഷം സിനിമയിൽ നിന്ന് പൂർണ്ണമായി വിട്ടുനിൽക്കുന്ന താരം മകളുടെ ചിത്രങ്ങൾ വല്ലപ്പോഴുമേ പങ്കുവെയ്ക്കാറുള്ളൂ. ഒരു വലിയ ഇടവേളയ്ക്ക് ശേഷം അരിന്റെ ചിത്രം പങ്കുവെച്ചപ്പോള് ആരാധകര് അത് ഏറ്റെടുക്കുകയായിരുന്നു.
