തിരുവനന്തപുരം: വിദേശത്ത് കൊവിഡിന്റെ പുതിയ വകഭേദമായ ‘ഒമിക്രോണ്’ (ബി1.1.529) കണ്ടെത്തിയ സാഹചര്യത്തില് സംസ്ഥാനത്തും ആരോഗ്യ വകുപ്പ് ജാഗ്രതാ നിര്ദേശം നല്കി. കേന്ദ്ര മാര്ഗനിര്ദേശ പ്രകാരമാണിത്.
ഇന്ത്യയിലേക്ക് വരുന്ന എല്ലാ യാത്രക്കാരും 72 മണിക്കൂറിനകം ആര്ടിപിസിആര് പരിശോധന നടത്തി ‘എയര്സുവിധ’ പോര്ട്ടലില് അപ്ലോഡ് ചെയ്യണം. മാര്ഗനിര്ദേശങ്ങളില് പറയുന്ന വിദേശ രാജ്യങ്ങളില് നിന്നു വരുന്നവരെ കൂടുതല് നിരീക്ഷിക്കും. ഈ രാജ്യങ്ങളില് നിന്നു വരുന്നവര് സംസ്ഥാനത്തെ വിമാനത്താവളങ്ങളില് വീണ്ടും ആര്ടിപിസിആര് പരിശോധന നടത്തണം. എല്ലാ വിമാനത്താവളങ്ങളിലും കൂടുതല് പരിശോധനാ സൗകര്യമേര്പ്പെടുത്തും. ഇവര് ഏഴ് ദിവസം ക്വാറന്റൈനിലിരിക്കണം. അതിന് ശേഷം ആര്ടിപിസിആര് പരിശോധന നടത്തണം. ഈ രാജ്യങ്ങളില് നിന്നു വരുന്നവരില് സംശയമുള്ള സാമ്പിളുകള് ജനിതക വകഭേദം വന്ന വൈറസിന്റെ പരിശോധനയ്ക്കായി അയയ്ക്കും.
കേന്ദ്രത്തിന്റെ മാര്ഗനിര്ദേശമനുസരിച്ചുള്ള നടപടികള് സ്വീകരിച്ചിട്ടുണ്ടെന്ന് ആരോഗ്യ മന്ത്രി വീണാ ജോര്ജ് പറഞ്ഞു. നിലവില് ആശങ്കപ്പെടേണ്ട സാഹചര്യമില്ലെങ്കിലും എല്ലാവരും കൊവിഡ് മാര്ഗനിര്ദേശങ്ങള് പാലിക്കണമെന്നും മന്ത്രി നിര്ദേശിച്ചു.
