കൊച്ചി : നോക്കു കൂലി ചൂഷണം അവസാനിപ്പിക്കണം. ചുമട്ടു തൊഴിലാളി നിയമം ഭേദഗതി ചെയ്യണമെന്ന് സംസ്ഥാന സര്ക്കാരിനോട് ആവശ്യപ്പെട്ട് ഹൈക്കോടതി. നോക്കുകൂലിക്കെതിരെ സംസ്ഥാന പോലീസ് മേധാവി സര്ക്കുലര് ഇറക്കണമെന്നും ആവശ്യപ്പെട്ടു. നോക്കുകൂലി സംബന്ധിച്ച ഹര്ജി പരിഗണിക്കുകയായിരുന്നു ഹൈക്കോടതി.
നോക്കൂകൂലിക്കെതിരെ കര്ശ്ശന നടപടികള് കൈക്കൊള്ളണം. നോക്കുകൂലി ചൂഷണം അവസാനിപ്പിക്കണമെന്ന് കേസ് പരിഗണിച്ച ജസ്റ്റിസ് ദേവന് രാമചന്ദ്രന് പറഞ്ഞു. ചുമട്ടുതൊഴിലാളി നിയമം ഭേദഗതി ചെയ്യണമെന്നും കോടതി ആവശ്യപ്പെട്ടു. നിയമ ഭേദഗതി സംബന്ധിച്ച് നിലപാട് അറിയിക്കാനും സര്ക്കാരിനോട് ആവശ്യപ്പെട്ടു.
നോക്കുകൂലി ആവശ്യപ്പെടുന്നവര്ക്കെതിരെ കര്ശന നടപടി സ്വീകരിക്കുമെന്ന് ചൂണ്ടിക്കാട്ടി സര്ക്കുലര് ഇറക്കാന് സംസ്ഥാന പോലീസ് മേധാവിയോടും കോടതി നിര്ദ്ദേശിച്ചിട്ടുണ്ട്. സര്ക്കുലര് ഡിജിപി എല്ലാ പോലീസ് സ്റ്റേഷനുകള്ക്കും അയയ്ക്കണം. ട്രേഡ് യൂണിയന് തീവ്രവാദം തടയണം എന്നും കോടതി പറഞ്ഞു.
ലോകത്ത് ആരും കേള്ക്കാത്ത രീതിയാണ് കേരളത്തിലുള്ളത്. വെറുതെ നോക്കി നിന്നാല് കൂലി. നോക്ക് കൂലി വാങ്ങുന്നത് പണാപഹരണം ആയി കാണേണമെന്നും കോടതി കൂട്ടിച്ചേര്ത്തു. നോക്കുകൂലി സംബന്ധിച്ച ഹര്ജി ഡിസംബര് 8 ലേക്ക് മാറ്റി.
