ന്യൂദല്‍ഹി: നവജ്യോത് സിംഗ് സിദ്ദു ഇന്ത്യയെ വഞ്ചിച്ചെന്നും കോണ്‍ഗ്രസ് പാര്‍ട്ടിയുടെ ദേശദ്രോഹ പദ്ധതി പുറത്തായെന്നും ബിജിപെ ദേശീയ ജനറല്‍ സെക്രട്ടറി തരുണ്‍ ചുഗ്.
പാകിസ്ഥാന്‍ പ്രധാനമന്ത്രി ഇമ്രാന്‍ ഖാന്‍ ജ്യേഷ്ഠ സഹോദരനാണെന്ന പഞ്ചാബ് കോണ്‍ഗ്രസ് അധ്യക്ഷന്‍ നവജ്യോത് സിംഗ് സിദ്ദുവിന്റെ പ്രസ്താവനയോട് പ്രതികരിക്കുകയായിരുന്നു അദ്ദേഹം. ‘പാകിസ്ഥാന്‍ വെച്ച് സ്വന്തം മാതൃരാജ്യത്തെക്കുറിച്ച് ഒരക്ഷരം പോലും സിദ്ദു ഉരിയാടിയില്ല. പകരം പാകിസ്ഥാന്‍ പ്രധാനമന്ത്രിയെക്കുറിച്ചാണ് അദ്ദേഹം വാഴ്‌ത്തിപ്പാടിയത്. ഇന്ത്യയ്‌ക്കെതിരെ ഡ്രോണുകളും ടിഫിന്‍ ബോംബുകളും മനുഷ്യബോംബുകളും ഉപയോഗിച്ച് പഞ്ചാബില്‍ തീവ്രവാദം വളര്‍ത്താന്‍ ശ്രമിച്ച രാജ്യമാണ് പാകിസ്ഥാന്‍’- അദ്ദേഹം പറഞ്ഞു.
ഒരു അതിര്‍ത്തി സംസ്ഥാനം എന്ന നിലയില്‍ പഞ്ചാബ് പാകിസ്ഥാന്റെ ഗൂഡാലോചനകള്‍ പുറത്തുകൊണ്ടുവരാന്‍ കഷ്ടപ്പെടുന്നതിനിടയില്‍ നവജ്യോത് സിംഗ് സിദ്ദുവിന്റെ പാകിസ്ഥാനോടുള്ള പ്രേമം ഇന്ത്യക്ക് ഭീഷണിയാണെന്നും ചുഗ് പറഞ്ഞു.
പഞ്ചാബില്‍ പാകിസ്ഥാന്റെ ഏജന്‍റായാണ് സിദ്ദു പ്രവര്‍ത്തിക്കുന്നത്. സോണിയാഗാന്ധിയും രാഹുല്‍ ഗാന്ധിയും കോണ്‍ഗ്രസ് പാര്‍ട്ടിയുടെ പാകിസ്ഥാനോടുള്ള സമീപനം വ്യക്തമാക്കണമെന്നും അദ്ദേഹം ചൂണ്ടിക്കാട്ടി.
