തിരുവനന്തപുരം : ഉദ്ഘാടനത്തിന് ക്ഷണിച്ചില്ലെന്നാരോപിച്ച് കോണ്‍ഗ്രസ്സിന്റെ ജില്ലാ പഞ്ചായത്തംഗം ആരോഗ്യകേന്ദ്രത്തിന്റെ ശിലാഫലകം തല്ലി തകര്‍ത്തു. കിടങ്ങുമ്മല്‍ ഉപ ആരോഗ്യ കേന്ദ്രത്തിന്റെ ശിലാഫലകം വെള്ളനാട് ഗ്രാമപഞ്ചായത്ത് മുന്‍ പ്രസിഡന്റ് കൂടിയായ വെള്ളനാട് ശശിയാണ് തല്ലി തകര്‍ത്തത്.
വെള്ളനാട് ശശി പ്രസിഡന്റ് ആയിരുന്നപ്പോഴാണ് ആരോഗ്യ ഉപകേന്ദ്രത്തിന്റെ നിര്‍മാണം ആരംഭിച്ചത്. കേന്ദ്ര പദ്ധതി പ്രകാരമായിരുന്നു നിര്‍മാണം. ഭരണസമിതിയുടെ കാലാവധി കഴിയാറായപ്പോള്‍ കെട്ടിടത്തിന്റെ പണി മുക്കാല്‍ ഭാഗം മാത്രമാണ് പൂര്‍ത്തിയായത്. എന്നാല്‍ തദ്ദേശ തെരഞ്ഞെടുപ്പിന് മുന്നോടിയായി അടൂര്‍ പ്രകാശ് എംപി കെട്ടിടത്തിന്റെ ഉദ്ഘാടനം നിര്‍വഹിച്ചതായി പ്രഖ്യാപിച്ച് പ്രസിഡന്റിന്റെ നേതൃത്വത്തില്‍ ശിലാസ്ഥാപനവും നടത്തി.
പിന്നീട് പുതിയ ഭരണ സമിതി അധികാരത്തില്‍ എത്തിയതോടെ മുമ്പ് സ്ഥാപിച്ച ശിലാഫലകം തറക്കല്ലിടല്‍ ചടങ്ങിന്റേത് മാത്രമാക്കി മാറ്റി. ആരോഗ്യ കേന്ദ്രത്തിന്റെ പണി പൂര്‍ത്തീകരിച്ച് പഞ്ചായത്ത് പ്രസിഡന്റിനെ കൊണ്ട് ഉദ്ഘാടനം നടത്തുകയും പുതിയ ശിലാഫലകം സ്ഥാപിക്കുകയും ചെയ്തു. ഈ ഉദ്ഘാടനത്തിന് ജില്ലാപ്പഞ്ചായത്ത് അംഗത്തെ ക്ഷണിക്കുകയോ ശിലാഫലകത്തില്‍ അദ്ദേഹത്തിന്റെ പേര് ഉള്‍പ്പെടുത്തുകയോ ചെയ്തില്ലെന്നാരോപിച്ച് വെള്ളനാട് ശശി ചുറ്റിക കൊണ്ട് അടിച്ചു തകര്‍ക്കുകയായിരുന്നു.
എന്നാല്‍ ഉദ്ഘാടന ചടങ്ങ് ലളിതമാക്കിയത് കൊണ്ടാണ് വെള്ളനാട് ശശിയെ ക്ഷണിക്കാതിരുന്നത് എന്നാണ് പഞ്ചായത്ത് ഭാരവാഹികള്‍ പറഞ്ഞത്. അതേസമയം സംഭവത്തിനെതിരെ പഞ്ചായത്ത് സെക്രട്ടറിയും വാര്‍ഡ് മെമ്പറും പോലീസില്‍ പരാതി നല്‍കിയിട്ടുണ്ട്. ശശിക്കെതിരെ പൊതുമുതല്‍ നശിപ്പിച്ചതിന് കേസ് എടുക്കും.
