ന്യൂദല്ഹി: ലോകമെങ്ങും പലപേരുകളില് ക്രിപ്റ്റോകറന്സികള് പെരുകുന്നതോടെ ഇന്ത്യ ഉടനെ സ്വന്തമായി ക്രിപ്റ്റോകറന്സി പുറത്തിറക്കും. സ്വകാര്യ ക്രിപ്റ്റോകറന്സികള് കള്ളപ്പണം വെളുപ്പിക്കാനും തീവ്രവാദ ധനസഹായത്തിനും വ്യാപകമായി ഉപയോഗിക്കപ്പെടുന്നത് ഒഴിവാക്കാനാണ് ഈ നീക്കം. ഇതിന്റെ ഭാഗമായി ഇന്ത്യയിലെ സ്വകാര്യ ക്രിപ്റ്റോകറന്സികള് നിരോധിക്കും. ക്രിപ്റ്റോ കറന്സികള് രാജ്യവിരുദ്ധ പ്രവര്ത്തനങ്ങള്ക്ക് വ്യാപകമായി ഉപയോഗിക്കപ്പെടുന്നതായി പരാതി ഉയരുന്നുണ്ട്.
കേന്ദ്ര ഡപ്യൂട്ടി ഡയറക്ടര് (കറന്സി) സഞ്ജു യാദവും ഇത് സംബന്ധിച്ച് ചില സൂചനകള് കഴിഞ്ഞ ദിവസം പുറത്തുവിട്ടിരുന്നു. സ്വകാര്യ ക്രിപ്റ്റോകറന്സികള് ഇന്ത്യയില് നിയമവിധേയമല്ലെന്നും കേന്ദ്രം അടുത്തുതന്നെ സ്വന്തം ഡിജിറ്റല് ക്രിപ്റ്റോ കറന്സി പുറത്തിറക്കുമെന്നും അദ്ദേഹം സൂചിപ്പിച്ചിരുന്നു. കഴിഞ്ഞ ദിവസം ധനകാര്യ പാര്ലമെന്റ് സമിതിയും ക്രിപ്റ്റോ കറന്സിയുമായി ബന്ധപ്പെട്ടുള്ള വിവിധ പങ്കാളികളും തമ്മിലുള്ള കൂടിക്കാഴ്ചയില് ഇക്കാര്യം വിശദമായി ചര്ച്ച ചെയ്തു.
ബിജെപി നേതാവും ധനകാര്യ പാര്ലമെന്റ് സ്റ്റാന്റിംഗ് കമ്മിറ്റി അധ്യക്ഷനുമായ ജയന്ത് സിന്ഹ അധ്യക്ഷനായ പാര്ലമെന്റ് പാനലിന് മുമ്പാകെ ക്രിപ്റ്റോ എക്സ്ചേഞ്ചുകള്, ക്രിപ്റ്റോ അസെറ്റ്സ് കൗണ്സില്, വ്യവസായ സംഘടനകള്, ഇതുമായി ബന്ധപ്പെട്ട മറ്റ് പങ്കാളികള് എന്നിവര് നിര്ദേശങ്ങള് മുന്നോട്ട് വെച്ചിരുന്നു. ഈ യോഗത്തിന് ശേഷം ജയന്ത് സിന്ഹയും സ്വകാര്യ ക്രിപ്റ്റോകറന്സികളെ നിയന്ത്രിക്കുമെന്ന വ്യക്തമായ സൂചന നല്കിയിട്ടുണ്ട്.
നേരത്തെ പ്രധാനമന്ത്രി നരേന്ദ്രമോദി ഇത് സംബന്ധിച്ച് വിവിധ മന്ത്രാലയങ്ങളിലെ ഉദ്യോഗസ്ഥരുമായും ആര്ബി ഐ ഉദ്യോഗസ്ഥരുമായും ക്രിപ്റ്റോ കറന്സി സംബന്ധിച്ച് ഉന്നതതല യോഗം നടത്തിയിരുന്നു. ഈയോഗത്തില് ക്രിപ്റ്റോകറന്സിയുടെ സുതാര്യതയില്ലായ്മയും അത് വാഗ്ദാനം ചെയ്യുന്ന വന്സാധ്യതുയമാണ് പ്രധാന പ്രശ്നങ്ങളായി ഉയര്ന്നുവന്നത്.
സര്ക്കാര് ചട്ടക്കൂട് വന്നാല് ക്രിപ്റ്റോ കറന്സി സംബന്ധിച്ച് സുതാര്യമല്ലാത്ത പരസ്യങ്ങളും വഴിതെറ്റിക്കുന്ന വാഗ്ദാനങ്ങളും നിയന്ത്രിക്കാന് കഴിയും. അനിയന്ത്രിതമായ ക്രിപ്റ്റോ വിപണി കള്ളപ്പണം വെളുപ്പിക്കലിനും തീവ്രവാദ ധനസഹായത്തിനും വഴിതുറക്കരുതെന്നും സര്ക്കാരിന് നിര്ബന്ധമുണ്ട്.
ക്രിപ്റ്റോ കറന്സി നിരോധിച്ചുകൊണ്ടുള്ള റിസര്വ്വ് ബാങ്ക് സര്ക്കുലര് 2020 മാര്ച്ചില് സുപ്രീംകോടതി റദ്ദാക്കിയിരുന്നു. ഇതേ തുടര്ന്ന് 2021 ഫിബ്രവരി അഞ്ചിന് റിസര്വ്വ് ബാങ്ക് തങ്ങളുടെ ഡിജിറ്റല് കറന്സി സംബന്ധിച്ച് ഒരു മാതൃക തയ്യാറാക്കാന് ഒരു സ്വകാര്യ പാനല് രൂപീകരിച്ചിരുന്നു.
സര്ക്കാര് ഇടപെടുന്നതോടെ ക്രിപ്റ്റോ കറന്സിക്ക് ഔദ്യോഗിക അംഗാരം ലഭിക്കുന്നതോടൊപ്പം ക്രിപ്റ്റോയുമായി ബന്ധപ്പെട്ടുള്ള ഇരുണ്ട പണമിടപാടിന്റെ ലോകത്തിന് തടയിടാനും കഴിയുമെന്നാണ് കരുതുന്നത്.
