തിരുവനന്തപുരം : ഇന്നും നാളേയും ശക്തമായ മഴയ്ക്ക് സാധ്യതയെന്ന് മുന്നറിയിപ്പ്. അഞ്ച് ദിവസത്തെ ജാഗ്രതാ നിര്ദ്ദേശമാണ് നല്കയിരിക്കുന്നത്. കൊല്ലം, ആലപ്പുഴ, കാസര്കോട് ഒഴികെ 11 ജില്ലകളില് ഇന്ന് ഓറഞ്ച് അലേര്ട്ട് പ്രഖ്യാപിച്ചിരിക്കുകയാണ്. ഈ മൂന്നു ജില്ലകളില് യെല്ലോ അലര്ട്ടായിരിക്കും.
ഇടുക്കി അടക്കമുള്ള അണക്കെട്ടുകളിലെ ഷട്ടറുകള് നിലവില് തുറന്നിട്ടിരിക്കുകയാണ്. അതിനാല് സംസ്ഥാനത്ത് അതീവ ജാഗ്രതാ നിര്ദ്ദേശം നല്കിയിരിക്കുകയാണ്. ഓറഞ്ച് അലര്ട്ടാണ് പ്രഖ്യാപിച്ചിട്ടുള്ളത് എങ്കിലും റെഡ് അലര്ട്ട് എന്ന പോലെ തയ്യാറെടുപ്പുകള് നടത്താനാണ് സര്ക്കാര് നിര്ദ്ദേശം. അപകടമേഖലകളില് നിന്ന് ആളുകള് മാറിതാമസിക്കണമെന്നും നിര്ദ്ദേശം നല്കിയിട്ടുണ്ട്. നാളെ 12 ജില്ലകളിലാണ് ഓറഞ്ച് അലര്ട്ടാണ്.
ഓറഞ്ച് അലര്ട്ട് നിലനില്ക്കുന്ന വടക്കന് ജില്ലകളില് നിലവില് രാവിലെ മഴയില്ലെങ്കിലും അതീവ ജാഗ്രത തുടരുകയാണ്. മണ്ണിടിച്ചില് സാധ്യതയുള്ള പ്രദേശങ്ങളില് നിന്ന് ഒഴിപ്പിക്കേണ്ട ആളുകളുടെ പട്ടിക തയ്യാറാക്കി. കേന്ദ്രസേനയും പലയിടങ്ങളിലായി ക്യാമ്പ് ചെയ്യുന്നുണ്ട്. അതേസമയം ആലപ്പുഴ ചെറുതനയില് 400 ഏക്കര് വരുന്ന തേവേരി പാടശേഖരത്തില് മട വീണ് രണ്ടാം കൃഷി പൂര്ണമായും നശിച്ചു. ആലപ്പുഴയില് മഴ മാറി നില്ക്കുകയാണ്. കുട്ടനാട്, അപ്പര് കുട്ടനാട് മേഖലയില് ജലനിരപ്പ് താഴ്ന്നു.
കഴിഞ്ഞ ദിവസങ്ങളില് കനത്ത മഴ പെയ്ത പ്രദേശങ്ങളില് അതീവ ജാഗ്രത വേണമെന്നാണ് നിര്ദ്ദേശം. മലയോര മേഖലകളില് കൂടുതല് ശക്തമായ മഴ ലഭിക്കാന് സാധ്യതയുണ്ട്. പ്രതിരോധ നടപടികള് വേഗത്തിലാക്കാന് ജില്ലാ കളക്ടര്മാര്ക്ക് നിര്ദ്ദേശമുണ്ട്.
തീരപ്രദേശങ്ങളിലും ജാഗ്രത വേണം. ഇടിമിന്നലിനും ശക്തമായ കാറ്റിനും സാധ്യതയുണ്ട്. കഴിഞ്ഞ ദിവസങ്ങളില് ശക്തമായ മഴ കിട്ടിയ പ്രദേശങ്ങളില് കൂടുതല് ശ്രദ്ധ വേണം. കേരളാ തീരത്ത് കാറ്റിന്റെ വേഗം 50 കിമി വരെയാകാന് സാധ്യതയുളളതിനാല് വെള്ളിയാഴ്ച വരെ മത്സ്യത്തൊഴിലാളികള് കടലില് പോകരുത്.
അഞ്ചുദിവസം ഇടിമിന്നലോടെ കനത്തമഴയ്ക്ക് സാധ്യതയുണ്ടെന്ന് മുന്നറിയിപ്പ്. ബുധനാഴ്ചയും വ്യാഴാഴ്ചയും അതിശക്തമായ മഴപെയ്യും. ഒരുസ്ഥലത്ത് ചെറിയ സമയത്തില് വന്തോതില് മഴപെയ്യാനുള്ള സാധ്യതയും നിലനില്ക്കുന്നുവെന്നാണ് കാലാവസ്ഥാവകുപ്പിന്റെ മുന്നറിയിപ്പ്. തെക്ക് പടിഞ്ഞാറന് കാലവര്ഷം പിന്വലിയുന്നതിനൊപ്പം, തുലാവര്ഷത്തിന് അനുകൂലമായ സാഹചര്യം ഒരുങ്ങുന്നതിനാലാണ് മഴ വീണ്ടും ശക്തമാകുന്നത്. കിഴക്കന് കാറ്റിന്റെ ശക്തി കൂടുന്നതും മഴ സാധ്യത വര്ധിപ്പിക്കും.
കനത്ത മഴയ്ക്കുള്ള സാധ്യത കണക്കിലെടുത്ത് മലയോരങ്ങളിലും നദീതീരങ്ങളിലും കര്ശനമായ ജാഗ്രത പാലിക്കണമെന്ന് മുഖ്യമന്ത്രി പിണറായി വിജയന് നിര്ദേശിച്ചു. വാസയോഗ്യമല്ലെന്ന് കണ്ടെത്തിയ വീടുകളില് താമസിക്കുന്നവരെയും നദിക്കരയില് അപകടകരമായ സാഹചര്യങ്ങളില് വസിക്കുന്നവരെയും മാറ്റിപ്പാര്പ്പിക്കാന് നിര്ദ്ദേശം നല്കിയിട്ടുണ്ട്.
പകല്സമയം മഴ മാറിനില്ക്കുന്നതുകണ്ട് അമിത ആത്മവിശ്വാസ്ം കാണിക്കേണ്ടതില്ല. കാലാവസ്ഥാ മുന്നറിയിപ്പുകള്ക്കും മാറ്റങ്ങള് സംഭവിക്കാം. അതിനാല് ദുരന്തനിവാരണ അതോറിറ്റിയുടെ നിര്ദേശങ്ങള് കര്ശനമായി പാലിക്കണമെന്നും മുഖ്യമന്ത്രി പറഞ്ഞു.
