ആലപ്പുഴ; കനയ്യകുമാറിനായി സിന്ദാബാദ് വിളിച്ചവരും ആസാദി മുദ്രാവാക്യം ഏറ്റു വിളിച്ച സഖാക്കളും ഇപ്പോള്‍ പാര്‍ട്ടിയുടെ പോസ്റ്റര്‍ കീറുന്ന തിരക്കില്‍. ഇക്കഴിഞ്ഞ 19ന് നടന്ന എഐവൈഎഫ് അമ്പലപ്പുഴ മണ്ഡലം സമ്മേളനത്തിന്റെ പോസ്റ്റര്‍ ചിത്രം കനയ്യയുടേതായിരുന്നു.
മുന്‍കാലങ്ങളില്‍ ഭഗത് സിങിന്റെ ചിത്രമായിരുന്നു എഐവൈഎഫ് പോസ്റ്ററുകളില്‍ ഇടം കണ്ടിരുന്നത്. ഭഗത് സിങിന് തുല്യനെന്ന നിലയിലാണ് യുവജന സഖാക്കള്‍ കനയ്യയെ വാഴ്‌ത്തിയിരുന്നത്. അതിനാലാണ് മറ്റു സഖാക്കളെയും ഭഗത് സിങിനെയും ഒഴിവാക്കി കനയ്യയുടെ പോസ്റ്ററുകള്‍ പ്രചരിപ്പിച്ചത്.
കമ്മ്യൂണിസ്റ്റ് പാര്‍ട്ടി നയത്തിന് വിരുദ്ധമാണ് ജീവിച്ചിരിക്കുന്ന നേതാക്കളുടെ പടം പോസ്റ്ററുകള്‍ നല്‍കുന്നത്. എന്നാല്‍ ഫാസിസ്റ്റ് വിരുദ്ധ പോരാളി, ഇന്ത്യന്‍ ചെഗുവേര തുടങ്ങിയ പരിവേഷങ്ങളാണ് കനയ്യയ്‌ക്ക് സഖാക്കള്‍ നല്‍കിയത്. ഈ മാസം ആദ്യം തന്നെ ഇയാള്‍ പാര്‍ട്ടി വിടുമെന്ന് പ്രചാരണമുണ്ടായിരുന്നു. എന്നാല്‍ അതെല്ലാം ബൂര്‍ഷ്വാ മാദ്ധ്യമങ്ങളുടെ കള്ളപ്രചാരമാണെന്ന പാര്‍ട്ടി ദേശിയ സെക്രട്ടറി ഡി. രാജയടക്കമുള്ളവരുടെ പ്രസ്താവന വിശ്വസിച്ചാണ് കനയ്യകുമാറിന്റെ ചിത്രം ഉപയോഗിച്ചത്.
ഇയാള്‍ കോണ്‍ഗ്രസില്‍ ചേക്കേറിയതോടെ കഴിഞ്ഞ ദിവസങ്ങളില്‍ തങ്ങള്‍ തന്നെ പതിച്ച പോസ്റ്ററുകള്‍ കീറി നശിപ്പിക്കേണ്ട ഗതികേടിലായി കുട്ടിസഖാക്കള്‍.
