ന്യൂദല്‍ഹി: സിപിഐ വിട്ട് കനയ്യകുമാര്‍ ഇന്ന് കോണ്‍ഗ്രസില്‍ ചേരാനിരിക്കെ കനയ്യയെയ്‌ക്ക് സ്വാഗതം ആശംസിച്ച് കോണ്‍ഗ്രസ്. പാര്‍ട്ടിയിലേയ്‌ക്ക് ചേരുന്നതില്‍ ആശംസ അറിയിച്ച് രാജ്യതലസ്ഥാനത്ത് കോണ്‍ഗ്രസ് പ്രവര്‍ത്തകര്‍ പോസ്റ്ററുകള്‍ പതിച്ചു. ദല്‍ഹി പിസിസി ഓഫീസിന് പുറത്ത് രാഹുല്‍ ഗാന്ധിയും കനയ്യയും ഒരുമിച്ചുള്ള ബാനറുകളും ഉയര്‍ന്നിട്ടുണ്ട്.
ഇന്ന് വൈകുന്നേരം എഐസിസി ആസ്ഥാനത്ത് നടക്കുന്ന ചടങ്ങില്‍ കനയ്യകുമാര്‍ കോണ്‍ഗ്രസ് അംഗത്വം സ്വീകരിക്കും. ശേഷം രാഹുല്‍ ഗാന്ധി, ജിഗ്നേഷ് മേവാനി, ഹാര്‍ദിക് പട്ടേല്‍ എന്നിവര്‍ക്കൊപ്പം പത്രസമ്മേളനവും നടത്തും എന്നാണ് ലഭിക്കുന്ന വിവരം. സിപിഐ വിടുന്ന കാര്യത്തില്‍ ഇതുവരെ പ്രതികരിക്കാതെയിരുന്ന കനയ്യ ഇടത് ബന്ധം അവസാനിപ്പിക്കുന്നതിന്റെ കാരണം പത്ര സമ്മേളനത്തില്‍ വ്യക്തമാക്കും.
കനയ്യ കുമാര്‍ രാഹുല്‍ ഗാന്ധിയെ കണ്ടു ചര്‍ച്ചകള്‍ നടത്തിയിരുന്നു. അതോടെ അദ്ദേഹം പാര്‍ട്ടിയില്‍ ചേരുമെന്ന അഭ്യൂഹങ്ങള്‍ പരന്നിരുന്നു. എന്നാല്‍ കനയ്യ പാര്‍ട്ടി മാറുന്നു എന്ന വാര്‍ത്തകള്‍ സിപിഐ ഇനിയും സ്ഥിരീകരിച്ചിട്ടില്ല. സിപിഐ ബിഹാര്‍ ആസ്ഥാന മന്ദിരത്തിലെ തനിക്കുള്ള മുറിയില്‍ നിന്നും കനയ്യകുമാര്‍ എസി അഴിച്ചുമാറ്റി കൊണ്ടുപോയത് വാര്‍ത്തയായിരുന്നു.
