കോഴിക്കോട്: എംഎസ്എഫ് നേതാക്കളുടെ ലൈംഗികാധിക്ഷേപത്തില് പരാതിപ്പെട്ടവരെ അനുകൂലിക്കാത്തവരെ മാത്രം ഉള്പ്പെടുത്തി ഹരിതയ്ക്ക് പുതിയ സംസ്ഥാന കമ്മിറ്റിയെ മുസ്ലിം ലീഗ് നേതൃത്വം പ്രഖ്യാപിച്ചു. പഴയ കമ്മിറ്റിയില് ട്രഷററായിരുന്ന മലപ്പുറം സ്വദേശി ആയിശ ബാനു ആണ് പ്രസിഡന്റ്. എംഎസ്എഫ് നേതാക്കള്ക്കെതിരെയുള്ള പരാതിയില് ആയിശ ഒപ്പിട്ടിരുന്നില്ല.
കണ്ണൂരിലെ റുമൈസ റഫീഖ് ആണ് ജനറല് സെക്രട്ടറി. സജ്വ ഹനീന (മലപ്പുറം), ഷാദിഹ റാശിദ് (കാസര്കോട്), അയ്ഷ മറിയം (പാലക്കാട്) എന്നിവര് വൈസ് പ്രസിഡന്റുമാരാണ്. അഫ്ഷില (കോഴിക്കോട്), ഫായിസ. എസ് (തിരുവനന്തപുരം), അഖീല ഫര്സാന (എറണാകുളം) എന്നിവര് സെക്രട്ടറിമാരും നയന സുരേഷ് (മലപ്പുറം) ട്രഷററുമാണ്.
ലൈംഗികാധിക്ഷേപം നടത്തിയെന്ന് ഹരിതയിലെ 10 നേതാക്കള് വനിതാ കമ്മിഷന് നല്കിയ പരാതിയില് കഴിഞ്ഞ ദിവസം എംഎസ്എഫ് സംസ്ഥാന പ്രസിഡന്റ് പി.കെ. നവാസിനെ അറസ്റ്റ് ചെയ്ത് ജാമ്യത്തില് വിട്ടിരുന്നു. വനിതാ കമ്മിഷനില് നല്കിയ പരാതി പിന്വലിക്കണമെന്ന ലീഗ് നേതൃത്വത്തിന്റെ നിര്ദേശം ചെവിക്കൊള്ളാത്തതിന്റെ പേരിലാണ് പഴയ ഹരിത കമ്മിറ്റി പിരിച്ചുവിട്ടത്. പരാതിക്കാരും അവരെ പിന്തുണയ്ക്കുന്നവരും തങ്ങളുടെ നിലപാടില് ഉറച്ചുനിന്നതിനാല് പുതിയ കമ്മിറ്റിയില് ഇവരെയെല്ലാവരെയും വെട്ടിനിരത്തുകയായിരുന്നു.
