കൊച്ചി : ശ്രീലങ്കയിൽ നിന്നും മത്സ്യബന്ധന ബോട്ടുകളിൽ ഒരു സംഘം കേരളത്തിലേക്ക് പ്രവേശിച്ചതായി സംസ്ഥാന ഇന്റലിജന്സ് റിപ്പോര്ട്ട്. 13 പേരാണ് അനധികൃതമായി കൊച്ചിയിൽ എത്തിയിരിക്കുന്നത്. പാകിസ്താനിലേക്ക് കടക്കുകയാണ് ഇവരുടെ ലക്ഷ്യമെന്നും രഹസ്യപ്പൊലീസ് റിപ്പോര്ട്ട് പറയുന്നു. ഇതിനായി അവര് കേരളം ഇടത്താവളമാക്കുകയാണെന്ന് പറയുന്നു.
തമിഴ്നാട്ടില് നിന്നും ആലപ്പുഴ വഴിയാണ് ഇവർ കൊച്ചിയിൽ എത്തിയതെന്ന് സംസ്ഥാന ഇന്റലിജന്സ് റിപ്പോര്ട്ട് പറയുന്നു. ജലമാർഗ്ഗം പാകിസ്താനിലേക്ക് പോകാനാണ് സാദ്ധ്യത. ആലപ്പുഴ, കൊച്ചി എന്നിവിടങ്ങളിലെ ടൂറിസം കേന്ദ്രങ്ങളിൽ ഇവർ തങ്ങാൻ സാധ്യതയുണ്ടെന്നും പോലീസ് പറഞ്ഞു. മത്സ്യത്തൊഴിലാളികളുടെ സഹായത്തോടെ തീരദേശപ്പൊലീസ് പരിശോധന നടത്തുന്നുണ്ട്. സ്പെഷ്യല് ബ്രാഞ്ച് പൊലീസും പരിശോധനകള് ശക്തമാക്കിയിട്ടുണ്ട്.
വിവരം ലഭിച്ചതിന്റെ അടിസ്ഥാനത്തിൽ ഇരു ജില്ലകളിലെയും തീരമേഖലകളിൽ ജാഗ്രതാ നിർദ്ദേശം പുറപ്പെടുവിച്ചു. കർശന നിരീക്ഷണവും നടത്തുന്നുണ്ട്. ഹോംസ്റ്റേ, റിസോർട്ട്, ടൂറിസം കേന്ദ്രങ്ങൾ എന്നിവിടങ്ങളിൽ പോലീസ് പരിശോധന ശക്തമാക്കി. തമിഴ്നാട്ടിൽ നിന്നുമാണ് ശ്രീലങ്കൻ സംഘം കേരളത്തിലേക്ക് പ്രവേശിച്ചത് എന്നാണ് നിഗമനം. ഇവർ തമിഴ്നാട്ടിലേക്ക് കടന്നതായി നേരത്തെ ഇന്റലിജൻസ് മുന്നറിയിപ്പ് നൽകിയിരുന്നു.
സ്പെഷ്യല് ബ്രാഞ്ച് പൊലീസ് സംസ്ഥാനത്തെ പൊലീസ് സ്റ്റേഷനുകളില് ജാഗ്രതാ നിര്ദേശം നല്കിയിട്ടുണ്ട്. ജലമാര്ഗ്ഗമോ റോഡ് മാര്ഗ്ഗമോ ഇത്തരത്തില് ആരെങ്കിലും കടന്നുപോകുന്നുണ്ടോയെന്ന് അന്വേഷിക്കാനുള്ള നടപടിക്രമത്തിന്റെ ഭാഗമായാണ് പൊലീസ് സ്റ്റേഷനുകളില് ജാഗ്രതാ നിര്ദേശം നല്കിയിട്ടുള്ളതെന്ന് ആലപ്പുഴ സ്പെഷ്യല് ബ്രാഞ്ച് ഡിവൈ എസ്പി എം.ജി. സാബു പറയുന്നു.
സംശയാസ്പദമായ സാഹചര്യത്തില് കടലില് ബോട്ടുകള് കാണുന്നുണ്ടെങ്കില് റിപ്പോര്ട്ട് ചെയ്യാന് മത്സ്യത്തൊഴിലാളികള്ക്ക് നിര്ദേശം നല്കിയിട്ടുണ്ട് കഴിഞ്ഞ ഏതാനും മാസങ്ങളായി അടിക്കടി ഇത്തരത്തിലുള്ള ജാഗ്രതാനിര്ദേശങ്ങള് സംസ്ഥാന ഇന്റലിജന്സിന്റെ ഭാഗത്ത് നിന്നും ഉണ്ടാകുന്നുണ്ട്.
