കാബൂള്: പ്രശസ്ത കൊമേഡിയനായ നാസര് മുഹമ്മദ് എന്ന ഖഷ സ്വാനെ കൊലപ്പെടുത്തിയതിന്റെ ഉത്തരവാദിത്വം ഏറ്റെടുത്ത് താലിബാന്. അഫ്ഗാന് നാഷണല് പൊലീസില് സേവനമനുഷ്ഠിച്ചിരുന്ന ഖഷ സ്വാന് ടിക്ക് ടോക്ക് വീഡിയോകള് ഇറക്കിയിരുന്നു. ഇത്തരം പ്രവൃത്തികള് ഇസ്ലാമില് അനുവദിക്കുന്നില്ല. ഇതിന് പുറമെ പൊലീസ് സേവന കാലത്ത് താലിബാന് അണികളെ മര്ദിച്ച് കൊലപ്പെടുത്തി. താലിബാന് കോടതിക്കു മുമ്പാകെ ഹാജരാക്കാനാണ് ഇയാളെ പിടികൂടിയത്.
നാസര് മുഹമ്മദിനെ വീട്ടില്നിന്ന് കാറില് തട്ടിക്കൊണ്ടുപോയി അതിക്രൂരമായി മര്ദിക്കുന്ന വിഡിയോ പുറത്തുവന്നിരുന്നു. പിന്നാലെയാണ് നിരവധി തവണ വെടിയേറ്റ് മരിച്ച നിലയില് കണ്ടെത്തിയത്. കാറില് ഇദ്ദേഹത്തിന് ഇരുവശത്തും നിന്ന് മുഖത്തടിക്കുകയും മര്ദിക്കുകയും ചെയ്ത രണ്ടുപേരും സ്വന്തം അണികള് തന്നെയാണെന്ന് താലിബാന് വക്താവ് സബീഹുല്ല മുജാഹിദ് വ്യക്തമാക്കി.
അഫ്ഗാനിസ്ഥാനിലെ ഏറെ ജനപ്രിയമായ ഹാസ്യതാരമായ ഖാഷ സ്വാന് എന്ന് വിളിക്കുന്ന നാസര് മുഹമ്മദിന്റെ ദാരുണാന്ത്യ വാര്ത്തയറിഞ്ഞ് അഫ്ഗാനിലെ ജനങ്ങള് മാത്രമാല്ല, ലോകമാകെ ഞെട്ടിത്തരിച്ചിരിക്കുകയാണ്. കാണ്ഡഹാര് പ്രവിശ്യയിലാണ് ഈ സംഭവം നടന്നത്. വീട്ടില് നിന്നും നടനെ തട്ടിക്കൊണ്ട് പോയശേഷം മരത്തില് കെട്ടിയിട്ട് കഴുത്തറുത്ത് കൊന്നുവെന്നാണ് പ്രാദേശിക മാധ്യമങ്ങള് റിപ്പോര്ട്ട് ചെയ്യുന്നത്.
താലിബാന് വിരുദ്ധ പഷ്തൂണ് തഹഫൂസ് പ്രസ്ഥാനത്തിലെ പ്രവര്ത്തകനായ ഇഹ്തെഷം അഫ്ഗാന് ഹാസ്യനടന് നാസര് മുഹമ്മദിനെ താലിബാന്കാര് തട്ടിക്കൊണ്ടുപോകുന്നതും മര്ദ്ദിക്കുന്നതുമായ വീഡിയോ പങ്കുവെച്ചിട്ടുണ്ട്താലിബാനെ എതിര്ക്കുന്ന പഷ്തൂണ് തഹഫൂസ് പ്രസ്ഥാനത്തിന്രെ നേതാവും പാകിസ്ഥാന് ദേശീയ അസംബ്ലിയില് 2018 മുതല് അംഗവുമായ മൊഹ്സിന് ദാവര് ഇദ്ദേഹത്തിന്റെ ദാരുണ മരണത്തെക്കുറിച്ച് ട്വിറ്ററില് കുറിപ്പ് പങ്കുവെച്ചിട്ടുണ്ട്.
താലിബാന് ഭീകരരും അഫ്ഗാന് സൈന്യവും തമ്മിലുള്ള തുറന്ന പോരില് സാധാരണക്കാരുടെയും കുട്ടികളുടെയും എണ്ണത്തില് വന്വര്ധനവാണുള്ളതെന്ന് ഐക്യരാഷ്ട്രസഭയുടെ റിപ്പോര്ട്ടില് പറയുന്നു. മെയ്, ജൂണ് മാസത്തില് മാത്രം 2400 അഫ്ഗാന് പൗരന്മാര് പരിക്കേല്ക്കുകയോ കൊല്ലപ്പെടുകയോ ചെയ്തിട്ടുണ്ടന്ന് യുഎന് കണക്കുകള് സൂചിപ്പിച്ചു. ഇപ്പോള് അഫ്ഗാനിസ്ഥാനിലെ ഗ്രാമപ്രദേശങ്ങളില് 85 ശതമാനവും താലിബാന്റെ കയ്യിലാണ്. അഫ്ഗാനിലെ 419 ജില്ലാ കേന്ദ്രങ്ങളില് ഭൂരിഭാഗവും താലിബാന്റെ അധീനതയിലായിക്കഴിഞ്ഞു. താലിബാന് ക്രൂരമായി സാധാരണക്കാരെ കൊല്ലുന്നതിന്റെ വീഡിയോകള് സമൂഹമാധ്യമങ്ങളില് വന്തോതില് പ്രചരിക്കുന്നുണ്ട്. തങ്ങളുടെ ഊഴം എപ്പോഴെന്ന് കാത്ത് ഭയന്ന് വിറച്ച് കഴിയുകയാണ് അഫ്ഗാനിസ്ഥാനിലെ സാധാരണ ജനങ്ങള്.
