ന്യൂഡല്‍ഹി: കേന്ദ്ര സര്‍ക്കാര്‍ ജീവനക്കാരുടെ ക്ഷാബത്ത(ഡിഎ) 11 ശതമാനം വര്‍ധിപ്പിച്ചു. പ്രധാനമന്ത്രി നരേന്ദ്രമോദിയുടെ അധ്യക്ഷതയില്‍ ചേര്‍ന്ന മന്ത്രസഭായോഗമാണ് ക്ഷാമബത്ത 17 ശതമാനത്തില്‍നിന്ന് 28 ശതമാനമായി ഉയര്‍ത്തിയത്. കേന്ദ്ര സര്‍ക്കാര്‍ ജീവനക്കാരുടെയും പെന്‍ഷന്‍കാരുടെയും ഡിഎ, ഡിആര്‍ വര്‍ധന കഴിഞ്ഞവര്‍ഷം സര്‍ക്കാര്‍ മരവിപ്പിച്ചിരുന്നു. കോവിഡ് വ്യാപനത്തെതുടര്‍ന്ന് സര്‍ക്കാരിനുണ്ടാകുന്ന അധികബാധ്യത കണക്കിലെടുത്തായിരുന്നു അന്നത്തെ തീരുമാനം.
ക്ഷാമബത്ത പുനഃസ്ഥാപിച്ചത് ജീവനക്കാരുടെ ശമ്പളത്തില്‍ കാര്യമായ വര്‍ധനവിനിടയാക്കും. 2020 ജനുവരി ഒന്നുമുതല്‍ ജൂണ്‍ 30വരെയുള്ള നാല് ശതമാനം, 2020 ജൂലൈ ഒന്നുമുതല്‍ 2020 ഡിസംബര്‍ ഒന്നുവരെയുള്ള മൂന്നു ശതമാനം, ഈ വര്‍ഷം ജനുവരി ഒന്നുമുതല്‍ 2021 ജൂണ്‍ 30 വരെയുള്ള നാലു ശതമാനം എന്നിങ്ങനെ മൂന്നുഗഡു ഡിഎ ആണ് നല്‍കാനുണ്ടായിരുന്നത്.
