തിരുവനന്തപുരം: യുഎഇ കോണ്സല് ജനറല് ജമാല് ഹുസൈന് അല് സാബി, അറ്റാഷെ റാഷിദ് ഖാമിസ്, ചീഫ് അക്കൗണ്ടന്റ് ഖാലിദ് എന്നീ പ്രതികള്ക്ക് കസ്റ്റംസിന്റെ ഷോക്കോസ് നോട്ടീസ്. കോണ്സല് ജനറല് സംസ്ഥാനത്തെ മന്ത്രിമാരുമായും ഉന്നത ഉദ്യോഗസ്ഥരുമായി വഴിവിട്ട ബന്ധം സ്ഥാപിച്ചുവെന്ന ഗുരുതര വെളിപ്പെടുത്തലാണ് ഇതിലുള്ളത്. സരിത്തിനേയും സ്വപ്നയേയും കരുക്കളാക്കിയായിരുന്നു ഇതെന്നും സ്വര്ണ്ണക്കടത്ത് കേസില് സര്ക്കാരിനെ പ്രതിക്കൂട്ടിലാക്കിയുള്ള 260 പേജ് ഷോക്കോസ് നോട്ടീസില് കസ്റ്റംസ് പറയുന്നു. മൂന്ന് പേരെയും പ്രതിപ്പട്ടികയില് ഉള്പ്പെടുത്തിയതിനുള്ള വ്യക്തമായ കാരണങ്ങള് ചൂണ്ടിക്കാട്ടിയാണ് നോട്ടിസ്. സംസ്ഥാന സര്ക്കാരിന്റെയും വിദേശകാര്യ മന്ത്രാലയത്തിന്റെയും പ്രോട്ടോക്കോള് നിയമങ്ങള് പാലിച്ചായിരുന്നില്ല കേരളത്തിലെ പ്രവര്ത്തനം.
മുഖ്യമന്ത്രിയുടെ ഓഫീസില് യോഗങ്ങള് നടത്തിയതിനൊപ്പം ചില മന്ത്രിമാരും ഇവരുടെ വലയില് വീണതായുള്ള സൂചനയും നോട്ടിസിലുണ്ട്. കോണ്സല് ജനറലിന് സംസ്ഥാന സര്ക്കാര് നല്കിയ വൈ കാറ്റഗറി സുരക്ഷ പലഘട്ടങ്ങളിലും നിയമവിരുദ്ധമായ കാര്യങ്ങള്ക്ക് ദുരുപയോഗം ചെയ്തു. സുരക്ഷാ ഭീഷണി ഇല്ലാതിരുന്നിട്ടും പ്രോട്ടോക്കോള് ഓഫീസിനെ മറികടന്നായിരുന്നു സുരക്ഷ നല്കിയതെന്നും നോട്ടിസില് പറയുന്നു. യുഎഇയില്നിന്ന് നിരോധിത മരുന്ന്, സിഗരറ്റ് അടക്കമുള്ളവ വിയറ്റ്നാമില് കോണ്സല് ജനറലായി ജോലി ചെയ്യവേ കളക്കടത്ത് നടത്തി.
ഇവ ഇന്സ്റ്റാഗ്രമിലൂടെ വില്പന നടത്തി. ഇത് കണ്ടെത്തിയതോടെ എടുത്ത ശിക്ഷാനടപടിയുടെ ഭാഗമായുള്ള സ്ഥലംമാറ്റത്തിലൂടെയാണ് കോണ്സല് ജനറല് അടക്കമുള്ള ഉദ്യോഗസ്ഥര് കേരളത്തിലെത്തിയതെന്നും നോട്ടീസില് പറയുന്നു. സരിത്തിനേയും സന്ദീപിനേയും ഉപയോഗിച്ച് കേരളത്തില് കള്ളക്കടത്ത് നടത്താനും സംഘം പദ്ധതിയിട്ടു. പിന്നീട് സ്വപ്ന, റമീസ് എന്നിവരിലൂടെ സ്വര്ണ്ണക്കടത്തിലേക്ക് തിരിഞ്ഞു. കേരളത്തില്നിന്ന് കള്ളക്കടത്തിലൂടെ ലഭിക്കുന്ന പ്രതിഫലത്തില് കള്ളനോട്ടുണ്ടോ എന്ന് തിരിച്ചറിയാനായി കോണ്സല് ജനറലിന്റെ നിര്ദേശപ്രകാരം സരിത്ത് നോട്ടെണ്ണല് യന്ത്രം വാങ്ങി നല്കിയെന്നും നോട്ടീസില് പറയുന്നു.
