സമൂഹമാധ്യമങ്ങളില്‍ ആരാധകരുമായി ഏറ്റവുമധികം സംവദിക്കാറുള്ള നടിയാണ് അനുശ്രീ. ഇടയ്‌ക്കിടെ ഫേസ്ബുക്കിലും ഇന്‍സ്റ്റാഗ്രാമിലും എത്തി നടി ലൈവായി ആരാധകരുമായി സംസാരിക്കാറുണ്ട്. അതിനിടെ അശ്ലീല കമന്റുമായി എത്തുന്നവര്‍ക്ക് ഉചിതമായ മറുപടി നല്‍കിയാണ് അനുശ്രീ തിരിച്ചയക്കാറുള്ളത്. അത്തരം ഒരു ചാറ്റാണ് ഇപ്പോള്‍ സോഷ്യല്‍ മീഡിയയില്‍ വൈറലായിരിക്കുന്നത്.
ഇന്‍സ്റ്റാഗ്രാം ചാറ്റിനിടെയാണ് അശ്ലീല കമന്റുമായി എത്തിയ ആള്‍ക്ക് അനുശ്രീ ‘ചൂടന്‍’ മറുപടി നല്‍കിയത്. കഴിഞ്ഞ ദിവസം നടന്ന ചോദ്യോത്തര വേളയിലാണ് നടിയുടെ ഹോട്ട് ചിത്രം ഒരാള്‍ ചോദിച്ചത്. എന്നാല്‍ ഇയാളെ നിരാശനാകാതെ ‘ചൂടന്‍’ ചിത്രം തന്നെ അനുശ്രീ നല്‍കി.
ഹോട്ട് എന്നാല്‍ മലയാളത്തില്‍ ചൂടന്‍ എന്നര്‍ത്ഥം. അത്തരത്തില്‍ ശരിക്കും ഒരു ചൂടന്‍ ചിത്രം തന്നെ പോസ്റ്റ് ചെയ്യുകയും ചെയ്തു. കാസറോളിനുള്ളില്‍ ആവി പറക്കുന്ന ചൂട് ദോശ അടുക്കി വച്ചിരിക്കുന്ന ചിത്രമാണ് ഹോട്ട് ചിത്രം ചോദിച്ചയാള്‍ക്ക് അനുശ്രീ നല്‍കിയത്.
മറ്റുള്ള ചോദ്യങ്ങള്‍ക്കും അനുശ്രീ കൃത്യമായ മറുപടി ആരാധകര്‍ക്ക് നല്‍കി. മമ്മൂട്ടിയെക്കുറിച്ച് പറയാന്‍ പറഞ്ഞപ്പോള്‍, ‘ഒറ്റവാക്കില്‍ ഒതുക്കാന്‍ പറ്റാത്ത പ്രതിഭാസം ‘ എന്നാണ് നടി മറുപടി നല്‍കിയത്. സിനിമയിലെ ഏറ്റവും അടുത്ത സുഹൃത്തുക്കളുടെ പേര് ചോദിച്ചപ്പോള്‍ സ്വാസിക, ശിബ്ല എന്നും അനുശ്രീ മറുപടി നല്‍കി. അറേഞ്ച്ഡ് വെഡ്ഡിങിനേക്കാള്‍ പ്രണയവിവാഹമാണ് ഇഷ്ടമെന്നും നടി ചാറ്റില്‍ വ്യക്തമാക്കുന്നു.
