തിരുവനന്തപുരം : തെരഞ്ഞെടുപ്പ് വോട്ടെണ്ണല് ദിനത്തില് കോവിഡ് പ്രോട്ടോക്കോള് പാലിക്കുന്നതിന്റെ ഭാഗമായി വോട്ടെണ്ണല് കേന്ദ്രങ്ങളിലെത്തുന്നവര്ക്ക് ആര്ടിപിസിആര് പരിശോധന നടത്തണം. ഇതിനുള്ള സൗകര്യങ്ങള് ഒരുക്കാന് ആവശ്യപ്പെട്ട് ആരോഗ്യ പ്രിന്സിപ്പല് സെക്രട്ടറിക്ക് മുഖ്യ തെരഞ്ഞെടുപ്പ് ഓഫീസര് ടിക്കാറാം മീണ അറിയിച്ചു.
തെരഞ്ഞെടുപ്പ് ഡ്യൂട്ടിയുള്ള ഉദ്യോഗസ്ഥര്, സ്ഥാനാര്ത്ഥികള്, കൗണ്ടിങ് ഏജന്റുമാര്, മാധ്യമ പ്രതിനിധികള് എന്നിവര്ക്കാണ് വോട്ടെണ്ണല് കേന്ദ്രത്തിലേക്ക് പ്രവേശനമുള്ളത്. ഇവര്ക്ക് വ്യാഴാഴ്ച ആര്ടിപിസിആര് പരിശോധന നടത്താന് സൗകര്യമൊരുക്കണമെന്നാണ് നിര്ദ്ദേശം നല്കിയിരിക്കുന്നത്.
ആര്ടിപിസിആര് ടെസ്റ്റ് സാധ്യമല്ലാത്ത സാഹചര്യത്തില് മെയ് ഒന്നിന് എടുത്ത ആന്റിജന് പരിശോധന ഫലമുള്ളവര്ക്കും വോട്ടെണ്ണല് കേന്ദ്രത്തില് പ്രവേശിക്കാം. ഇതുസംബന്ധിച്ച് ജില്ലാ ഭരണകൂടങ്ങള്ക്ക് ഉത്തരവ് കൈമാറിയിട്ടുണ്ട്.
കോവിഡ് വ്യാപനം തടയാനായി 72 മണിക്കൂറിനുള്ളില് ആര്ടിപിസിആര് പരിശോധനയോ, രണ്ടുഡോസ് വാക്സിനോ എടുത്തവരെയാകും വോട്ടെണ്ണല് കേന്ദ്രത്തില് പ്രവേശനം അനുവദിക്കുക എന്ന സര്ക്കാര് ഉത്തരവിന്റെ പശ്ചാത്തലത്തിലാണ് മുഖ്യ തെരഞ്ഞെടുപ്പ് ഓഫീസറുടെ നിര്ദ്ദേശം.
